Некои проблеми со спиење не се однесуваат на тешко заспивање - почнуваат од другата страна, кога луѓе се будат два часа пред алармот, совршено освестени и спремни да го почнат денот, и покрај тоа што разумот кажува дека не е време за станување. Излегува дека ова се должи на неколку фактори, врз кои што можеме да влијаеме.
Попшугар разговара со Ваишнави Кундел, лекарка и професорка по пулмонарна критична грижа и медицина за спиење, за да каже што е тоа што нѐ буди порано и што можеме да направиме за да отспиеме колку што треба.
Опструктивна апнеа: Луѓето со оваа состојба искусуваат делумно или комплетно блокирање на воздушните патишта додека спијат и како резултат имаат епизоди кога престануваат да дишат навечер. Ова може да ги разбуди повеќе пати, според д-р Кундел, а додава и дека може да се работи за микро-вознемирувања, кога не си ни свесен дека се будиш. Преку ден си истоштен.
Синдром на немирна нога: Се случува кога имаш неодолив нагон да ги мрдаш нозете. Особено навечер и ноќе, што го прекинува спиењето. Кај жените се случува почесто отколку кај мажите и може да се јави за време на бременоста, или како контраиндикација на дефицит на железо, или од антидепресиви.
Анксиозност: Нервите и разулавените мисли го отежнуваат спиењето, но можат да предизвикаат и будење во сред ноќ. „Кога ќе се разбудите, може да останете будни затоа што сега размислувате за сѐ што треба да направите во текот на денот,“ објаснува д-р Кундел.
Алкохол: Може ви се чини дека алкохолот помага да заспиете, но може доста дисруптивно да делува насонот. Предизвикува будење порано отколку што сакаме, особено ако се пие три до четири часа пред спиење (како што и бива).
Електроника: Телефонот, телевизорот, компјутерот и други апарати емитираат сина светлина што го стимулира мозокот и инхибира мелатонин (хормон што помага да заспиеме и да останеме заспани).
Како да се доспиеме?
- Да избегнуваме електроника еден до два часа пред спиење
- Да напишеме „список на грижи“ - ако е до анксиозност, тогаш д-р Кундел предлага да запишеме сѐ што нѐ потресува за наредниот ден, па така ќе можеме да си кажеме „ОК, запишано ми е, не треба да го мислам.“
- Да создадеме рутина за одење во кревет - некаков вид на релаксација, топол пијалок без кофеин, и слично. Ако е рутина, тогаш ќе почне да му дава на телото информација дека е време за кревет.
- Разговор со доктор: во случај на синдром на немирна нога или апнеа, препорачливо е да се разговара со доктор.
Што ако и ноќеска се разбудите?
Не гледајте на саат: ќе се потсетите дека пак треба да се нервирате дека не можете да заспиете, што значи дека уште потешко ќе заспиете. Сѐ што кажува колку е саат ставете во фиока и потрудете се да не ја отварате ако уште не е разденето.
Ако не заспиете и по 20 минути, станете и одете во друга соба, за да не го научите мозокот да ја гледа спалната како простор за анксиозност. Вртење во кревет со часови и анксиозно чекање повторно да заспиете ја расипува таа врска и може да го влоши проблемот на долги патеки.
