Само неколку часа по одлуката на Врховниот суд на САД да ги поништи повеќето од глобалните царини воведени од администрацијата на Трамп, тој потпиша нова уредба за глобална царина од 10% како замена за мерките што судот ги прогласи за неуставни.
Судиите оценија дека претседателот ги пречекорил своите овластувања кога минатата година воведе широки увозни давачки за стоки од речиси целиот свет а нивната одлука беше поздравена и од демократските и од републиканските поборници на слободната трговија.
Трамп ја нарече пресудата „ужасна“ и „длабоко разочарувачка“, а за дел од судиите рече дека се будали и непатриоти. Најави дека враќањето на веќе земените пари нема да биде едноставно и очекува правната битка да трае со години.
Израел објави дека при воздушен напад синоќа бил убиен Али Лариџани, секретарот на иранскиот Врховен совет за национална безбедност и практично главен командант во војната против Израел и САД. Лариџани наводно бил ликвидиран во засолниште во кое престојувал со својот син.
Израелскиот министер за одбрана изјави дека е ликвидиран и Голамреза Солејмани, командантот на милицијата Басиџ задолжена за заштита на режимот во Техеран од домашни закани. „Заедно со премиерот (Нетанјаху) им наложивме на Израелските одбранбени сили да продолжат да го ловат раководството на режимот на угнетување во Иран“, изјави министерот Израел Кац.
Иранските власти не ја потврдија веста за смртта на Лариџани и Солејмани.
Лариџани последен пат беше се појави во јавноста на 13 март. Тој му беше близок советник на поранешниот врховен лидер Али Хамнеи, 12 години беше претседател на парламентот, а претходно беше главен преговарач на Техеран за нуклеарната програма.
Во една од своите последни обраќања, Лариџани се пожали дека Иран не ја добива очекуваната поддршка од муслиманските земји. „Ниедна исламска влада не застана покрај народот на Иран, освен во ретки случаи. САД и Израел од една страна и муслиманскиот Иран и силите на отпор од друга страна. На која страна од оваа битка стоите?“, порача Лариџани.
„Имам што да кажам за психотропните супстанци на одредени лица и парите што така лесно ги имаат заработено во изминатиот период“, изјави Петре Шилегов, коментирајќи ја одлуката на СДСМ да почне постапка за негово исклучување од партијата.
Шилегов своевремено беше претседател на Градската организација на СДСМ во Скопје и членуваше и во Извршниот одбор, кој синоќа ја донесе одлуката да го исклучи од партијата.
„Шилегов е уценет и одработува за ВМРО-ДПМНЕ, која толку падна, што единствената опција ѝ остана обидот да го урне СДСМ одвнатре“, соопшти партијата.
СДСМ лани го исклучи од членство и поранешниот потпретседател Јован Деспотовски, со образложение дека дејствувал против интересите на партијата и дека соработува со политички структури блиски до ВМРО-ДПМНЕ и до ЗНАМ.
