Вести › Набрзинка

Израелски министри бараат анексија на Западен Брег

3 јули 2025

Министрите и пратениците од израелската владејачка партија Ликуд побараа од премиерот Бенјамин Нетанјаху да прогласи анексија на палестинската територија Западен Брег пред да се распушти Кнесетот на крајот на овој месец.
„Ние, министрите и членовите на Ликуд од Кнесетот, бараме итно да се наметне израелски суверенитет и законодавство во Јудеја и Самарија“, пишува во петицијата, во која се користат библиските називи за територијата окупирана од Израел во војната во 1967 година.

Израел го контролира поголемиот дел од Западниот Брег и со нови доселенички населби ја проширува окупираната територија. По 1967 година изградил 160 населби за околу 700.000 еврејски доселеници, додека 2,7 милиони Палестинци се концентрирани во урбаните центри на Западниот Брег.
Министрите од Ликуд тврдат дека терористичкиот напад на Хамас на 7 октомври 2023 година покажал дека концептот на блокови од доселенички населби заедно со прогласувањето на Палестина како држава претставува егзистенцијална закана за Израел.
„Мора да се отстрани егзистенцијалната закана од внатре и да се спречи нов масакр во срцето на земјата“, наведуваат министрите и пратениците од Ликуд.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор