Сината боја најчесто асоцира на небото или морето. Мене секогаш ме потсеќа на мувлата, и ова е единствениот валиден доказ дека софистицираноста често е само козметички маскирано распаѓање. Кога ќе го соочите тој „расипан“ млечен крем со примарната, речиси вулгарна текстура на прженото месо, добивате нешто што наликува на дејвидлинчовски филмски кадар: навидум позната сцена од семејната трпеза која одеднаш станува премногу интензивна, премногу густа и вознемирувачки привлечна.
Овие панирани кофтиња во горгонзола сос наликуваат на чиста висцерална грешка, особено во контекст на оваа супер напорна денешница каде секој оброк треба да е еликсир. Аромата на горгонзолата во просторијата делува како тежок чад во подземните клубови каде што светлото е секогаш премногу придушено за да се види вистинското лице на соговорникот.
Сериозен вкус кој бара панкерско-шанкерска вештина за толерирање на дисонанцата. Похованото ќофте му доаѓа како агресивен преносител на текстура; крцкавата школка е тука само за да го зачува месото од целосната дезинтеграција под кремастата тежина на сосот.
Чинијата денес ќе се претвори во подиум каде што се разрешуваат тензиите помеѓу високата и ниската култура. Нема оставање простор за суптилни грицкања или аналитичко разложување на вкусовите. Ова е монолитен блок на хедонизмот и бара целосна посветеност.
Да се посветиме.
Потребни намирници
За ќофтињата:
- 500г мешано мелено месо (70% јунешко / 30% свинско)
- 1 јајце
- 3-4 лажици презла
- 1 китка свеж магдонос (ситно сечкан)
- Сол, свежо мелен црн бибер и прстофат оригано
За панирање: јајце, презла
За сосот од горгонзола:
- 150г плаво сирење
- 200мл неутрална павлака за готвење (минимум 30% масленост)
- 3 чешниња лук (претворени во паста)
- Свежо кршен црн бибер, буковец
Постапка на подготовка
Хомогенизација на месото:
Меленото месо се соединува со магдоносот, зачините, јајцето и презлата. Смесата мора да се меси додека не се постигне целосна еластичност. Се остава во фрижидер 45 минути за да се стабилизираат врските помеѓу состојките.
Обликување и оклопување:
Се формираат дискови со тежина од околу 120 грама. Секој дел се панира по строг редослед: изматени јајца и финална бариера од презла. Притиснете цврсто за презлата да стане интегрален дел од површината.
Термичка обработка:
Во масивна тава се загрева маслото. Ќофтињата се пржат додека не се постигне темна, златна боја на површината, која гарантира крцкавост. Се одмараат кратко на перфорирана површина за да се зачува острината на панировката. Ако ринглата ви развива до 9, пржете на 4-ка. 4 минути по страна.
Сосот:
Во тенџере, на ниска температура, се загрева павлаката. Се додава кремот од чешнињата лук. Се додава горгонзолата и се меша додека не се постигне кадифена конзистенција.
Сервирање:
Ќофтињата се поставуваат во чинија и веднаш се прелеваат со топлиот сос. Се додава црниот бибер, буковецот и перцата кромид како контраст на млечната тежина.
Се конзумира веднаш, на лице место.
И запомнете, ова не е оброк по кој се планира продуктивен работен ден, туку стратешка одлука за доброволна кома во име на вкусот.
Кирил Стоименов - интрото од Твин Пикс
