Вести › Набрзинка

САД го нападнаа главниот нафтен центар на Иран

14 март 2026

Претседателот Доналд Трамп изјави дека САД со прецизни проектили ги уништиле сите воени цели на иранскиот остров Харг – главниот терминал во кој се концентрирани 90% од иранската нафта за извоз. Ако продолжи иранската блокада на Ормускиот Проток, Трамп се закани со напади и врз нафтената инфраструктура на островот.
Харг е оддалечен 26 км од брегот на Иран, околу 500 км северозападно од Ормускиот Проток. Додека Револуционерната гарда пука кон танкерите и товарните бродови што се обидуваат да поминат низ протокот, Иран преку Харг продолжи да извезува сурова нафта. Откако почна војната пред две недели, ирански танкери пренесувале помеѓу 1,1 милион и 1,5 милиони барели нафта на ден.

Трамп вчера најави дека американската морнарица „наскоро“ ќе почне да ги придружува танкерите низ Ормускиот Проток.
Извори во Вашингтон не исклучуваат ни ограничена копнена операција. Од Пацификот кон Блискиот Исток веќе тргнала борбената група на амфибискиот десантен брод „Триполи“ со 5.000 маринци и морнари.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор