Постои непишано правило шо планирам сега да го запишам: дека најдобрите идеи се раѓаат по второто пиво, кога светот престанува да биде сив и станува палета на вкусови и можности.
И поле за културен натпревар меѓу народите, нормално.
Во овие брзински невремиња каде сè е „од нога“ - од пријателства до храна - одлуката да му го соблечеш „костумот“ на обичниот копан и да го претвориш во гастрономско ремек-дело е тешка анархија. Тоа е среден прст на сите оние што нè убедуваат дека немаме време. Имаме време, само прашање е дали ќе го потрошиме на бесцелно скролање по падините на социопатските премрежја или на обликување на совршената месна топка која пркоси дури и на гравитацијата.
Копанот, кој е типичен симбол на работничката трпеза, тука поминува низ софистицирана транзиција. Го „соблекуваме“, го затегнуваме и го завиткуваме во префинета шунка, правејќи го привлечен дури и за оние кои обично јадат со кренат мал прст. Плус ова е суптилен економски трик: со малку вештина и еден слој „глазура“, му ја дуплирате вредноста. Но, суштината е длабоко филозофска. На крајот на краиштата, во секој сочен гриц се крие вистината дека најголемиот луксуз не е во цената на намирниците, туку во меракот со кој се подготвени.
Потребни намирници:
- Пилешки копани: 5–6 парчиња
- Тенко сечена шунка или пршута: Доволно за да се завитка секој копан поединечно.
За сосот (глазура):
- 2 супени лажици кечап
- 1 супена лажица мед или агаве
- 1 мала лажица црвен пипер (благ или лут, по желба).
- Сол и црн бибер по вкус.
За гарнир:
- Краставица, маслинки и капари.
Обработка на месото:
Земете го пилешкиот копан и со остар нож направете кружен засек околу долниот дел на коската (зглобот). Турнете го месото нагоре кон поширокиот дел на копанот за да добиете топчеста форма, оставајќи го горниот дел од коската целосно исчистен. Отстранете ја кожата од целиот копан.
Завиткување:
Секое парче месо зачинете го со малку сол и бибер, а потоа цврсто завиткајте го во парче димена шунка или пршута. Шунката треба добро да се прилепи на месото за да ја задржи формата при термичката обработка.
Прва фаза на печење:
Наредете ги подготвените копани вертикално во сад за печење, претходно обложен со хартија за печење. Печете на 180°C околу 15–20 минути, додека месото не се стегне, а шунката не стане крцкава.
Подготовка на глазурата:
Во мал сад измешајте ги кечапот, медот и црвениот пипер. Мешајте додека не добиете хомогена и сјајна смеса.
Глазирање:
Извадете ги копаните и со кујнска четка богато премачкајте ги од сите страни со подготвениот сос. Вратете ги во печката уште 5-10 минути на истата температура, за сосот да се карамелизира и да добие темноцрвена боја.
Сервирање:
Послужете ги копаните топли, во комбинација со свежа салата од сечкани краставици, црни маслинки и капари, што ќе му даде потребна свежина на богатото месо.
Се препорачува со детско базенче за у двор пуно со коска ладни пива.
Кирил Стоименов - костимограф
