Вести › Набрзинка

Трамп нуди по 5.000 долари на секој Американец ако републиканците победат на изборите

10 September 2026

Претседателот Доналд Трамп најави дека ќе им исплати „дивиденда“ од 5.000 долари на сите возрасни Американци ако републиканците го задржат мнозинството во Конгресот на среднорочните избори во ноември. Анкети укажуваат дека демократите се на добар пат да преземат контрола врз барем еден дом во Конгресот.

Со приближно 270 милиони возрасни лица во САД, идејата би чинела околу 1.350 милијарди долари. Трамп изјави дека ќе има толку пари благодарение на „огромниот економски успех“ на нацијата.

Централната улога на Трамп на дводневната партиска конвенција во Далас ја прикажува стратегијата на републиканците за изборите за Претставничкиот дом и Сенатот на 3 ноември.
„Замислете си дека моето име е на гласачкото ливче“, им порача Трамп на републиканците.
Повеќето од првите говорници на конвенцијата се фокусираа на напади врз демократите, критикувајќи ги нивните екстремни ставови за трансродовите лица и безбедноста на границите. Помало внимание беше посветено на проблемите што денес им се најважни на Американците - војната со Иран и трошоците за живот.

извор

Run, Xhever Imeri, run!

10 September 2026

Џевер Имери, вработен во Царинската управа како заменик-директор на Секторот за администрација, е уапсен откако побарал мито од над 15.000 евра во врска со тендер во Царинската управа. Му биле дадени обележани пари.
По преземањето на парите, Имери не застанал на полициските наредби и избегал. Го фатиле и го уапсиле.
Уште колку ли вакви Џевери има?

извор

Роботаксија без возачи низ Загреб

10 September 2026

Од денес, по улиците на Загреб се движат празни автомобили, без возач и патници, како последен тест на системот за идните целосно автономни роботаксија.
Возилата се на компанијата Verne, основана од Мате Римац и Марко Пејковиќ, заедно со кинеската Pony.ai, која ја обезбедува технологијата за управување. Третиот партнер е Uber, преку чија апликација услугата наскоро ќе им биде достапна на корисници.
Verne нуди комерцијалната услуга за роботакси во Загреб уште од април, но досега во возилото секогаш седело лице – безбедносен оператор подготвен да ја преземе контролата – како што налагаат прописите. Новите тест-возила се без безбедносен оператор. Ова е прво такво тестирање на јавни патишта во Европа.
Автомобилите ќе имаат пробни тури на траса долга 22 километри, од деловната зона „Бузин“ до аеродромот „Фрањо Туѓман“.
Такси-возила без возач досега имаат само мал број компании во светот – пред сè Waymo (во сопственост на Alphabet), која нуди услуги во Феникс, Сан Франциско и други градови во САД, а планира да го прошири сервисот во Лондон и во Минхен.
Веќе пишувавме дека Римац не успеа да го заврши проектот за целосно автономни роботаксија од петто ниво во определениот рок, за да добие 180 милиони евра европски пари.