Вести › Набрзинка

Полските политички бегалци ја напуштиле Унгарија

11 May 2026

По промената на власта во Будимпешта, поранешниот полски министер за правда Збигњев Зјобро и неговиот заменик Марчин Романовски ја напуштиле Унгарија која им даваше политички азил од судско гонење во нивната земја во врска со обвиненија за криминал.
Новиот унгарски премиер Петер Маѓар, кој завчера официјално ја презеде функцијата, најави дека ќе ја укине заштитата што поранешната влада на Виктор Орбан им ја даваше на странски функционери и политичари обвинети за криминал.
Зјобро во Полска се соочува со 25 години затвор во врска со обвиненија за злоупотреба на моќ и пари. Обвинителите тврдат дека пренасочил 40 милиони евра од фонд за жртви на насилство за да купи израелски софтвер за надзор Пегасус за таргетирање на политичките противници.
Актуелниот министер за правда Валдемар Журек потврди дека Зјобро во саботата бил забележан на меѓународниот аеродром во Њу Џерси и најави дека Варшава официјално ќе побара од САД негова екстрадиција. Неговиот соработник Романовски уште во април го напуштил својот стан во Будимпешта.
Зјобро ги отфрла обвиненијата и тврди дека е жртва на политички прогон. „Подготвен сум да се појавам пред кој било независен суд, а американскиот е секако независен. Ако сакаат, можат да покренат екстрадиција, но тоа е тешка постапка во американските судови“, изјави Зјобро.

извор

Д-р Даниловски: Хантавирусот е новата суровина за глобалната индустрија на страв

10 May 2026

Доволен беше еден изолиран настан на крузер во Јужниот Атлантик за интернет-просторот повторно да експлодира со апокалиптични сценарија, „предвидувања“, мистериозни објави од минатото, сомнежи за глобални агенди и рециклирани теории за контрола на човештвото.
Речиси по автоматизам, повторно почнаа да циркулираат истите зборови: пандемија, контрола, депопулација, mRNA, „1984“... Како да постои готов шаблон што се активира секогаш кога во медиумите ќе се појави името на некој вирус.
Во меѓувреме, јавноста постепено престанува да прави разлика меѓу епидемиологија и алгоритамски произведен страв.
Истовремено, постојат реални причини за внимателност. Скопје и други средини се соочуваа со сериозни проблеми со отпадот. Контејнери преполни со денови. Купишта смет покрај улици. Расфрлан органски отпад. Диви депонии. Таквите услови неизбежно создаваат средина погодна за експанзија на популацијата на стаорци и глувци, потенцијален резервоар за повеќе инфективни заболувања, вклучително и хантавирусните инфекции.
Прагот на летото е момент кога институциите треба сериозно да пристапат кон дератизација, дезинфекција, санитарен надзор, урбана хигиена, контрола на дивите депонии, предупредува доктор Драган Даниловски.

извор

Хегсет ја исправа неправдата за војниците што одбиле ковид-вакцина

9 May 2026

Министерот за одбрана Пит Хегсет најави дека ќе им бидат вратени сите привилегии на припадниците на оружените сили на САД кои биле принудени да ја напуштат службата затоа што одбиле да се вакцинираат против ковид.
Поранешната администрација на Џо Бајден во 2021 година нареди задолжително вакцинирање на сите припадници на воените сили. Во текот на 500 дена, до 2023 година, биле отпуштени или поттикнати да дадат отказ повеќе од 8.000 лица кои одбиле да се вакцинираат.
Една недела откако го почна вториот мандат, Доналд Трамп со извршна наредба ги поништи отпуштањата и ги покани вработените да се вратат на служба. До април се вратиле 170, а уште 800 изразиле намера да се вратат.
Нова работна група ќе ја разгледува секоја штета што Пентагон им ја предизвикал на вработените. Ќе се испитува случај по случај дали одбивањето на вакцинација на кој било начин им наштетило на кариерите. Дури и ако немаат намера да се вратат на служба, Пентагон ќе им обезбеди начин да ги обесштети поради скратените бонуси или заслужените бенефиции.
„Се заколнавте дека ќе го штитите Уставот и ќе ѝ служите на нашата нација. Бевте малтретирани од Пентагон во времето на Бајден и ние ја поправаме таа неправда“, изјави Хегсет.

извор