„Рибата филозоф: есетрата, кавијарот и географијата на желбата“ е одбран за најнеобичен наслов на книга во 2024, со вкупно 27% од гласовите на читателите. Во најтесен избор влегле и „Родителствување во стил на госпoдар на занданите“ (How to Dungeon Master parenting), која пак беше за влакно пред „Гледајќи низ спекулумот: истражување на женското здравствено движење“. Ова е прв пат првите три наслова да се толку блиску еден до друг во 46-годишната традиција на доделувањето на наградата. И прв пат да се толку обични.
Уште при самото прогласување организаторите беа свесни дека победникот може да биде контроверзен, бидејќи книгата е излезена во 2005, а новото издание е само дополнето. Таа се занимава со рибата есетра, нејзиниот кавијар и како оваа риба се нашла на четвртото место на најзагрозените видови на Светскиот фонд за природа.
Некои од насловите кои завршија последни се всушност најинтересните. Таков е „Попалени по кожа: секс и сексуалност во откачените вестерни“ (Hell-Bent for Leather: Sex and Sexuality in the Weird Western) со само 5% од гласовите. Ова е необично затоа што претходни години наслови со сексуални алузии во нив секогаш биле на врвот, па дури и победници. Така беше „Валканата дупка и нејзините варијации“ во 2019 и „Дизајнирање на тврди структури со високи перформанси“ од 2000-та.
