На постерот кој ја рекламира мини-серијата во шест продолженија „Ерик“ (Нетфликс) има три главни нешта, подредени едно во друго како руски куклички: дете со ранче и црвено-жолта јакна внатре телото на Бенедикт Камбербач, кој пак е сместен во силуета на нешто што изгледа како чудовиштето Јети. Визуелно луциден, тој ја доловува и структурата на самата серија, во која не само што има дури и премногу приказни во приказни, туку и која физички завлегува во простори кои на англиски метафорично се нарекуваат underbelly - утробието, внатрешната и темната страна на градот.
Камбербач е генијален куклар по име Винсент (алузија на Винсент ван Гог?), креатор на ТВ шоу во стилот на „Улицата Сезам“. Насловот на програмата - Good Day Sunshine - е соодветен за деца, но истовремено длабоко ироничен, бидејќи ништо во светот на реалните њујоршки деца од 1980-тите во серијата не е ни добро ни сончево. Деветгодишниот син на Винсент, Едгар, можеби има повеќе среќа од други - неговите баба и дедо се пребогати сопственици на недвижнини, родителите го сакаат, има пристоен живот и талент за цртање. Па сепак, навидум идиличната ситуација ја заматуваат повеќе нешта, како цинизмот и алкохолизмот на татко му и постојаните домашни караници.
По една таква конфликтна ноќ, Винсент пропушта да го однесе синот до школо, овој заминува сам (нешто што очигледно не се препорачува за деца во Њујорк) и исчезнува. Тука приказната се раздвојува на неколку патеки. Прва е онаа полициската, која барајќи го Едгар го поврзува со постар случај на исчезнат црн 14-годишник и со цела мрежа на подведувачи на малолетници за елитна клиентела. Втора е приватната на главниот полицаец, кој чува голема тајна. Трета е онаа на Винсент, кој откако доживува нервен слом од вина поради исчезнувањето на детето, почнува да се опседнува со материјализирање на влакнесто чудовиште во стилот на цртаниот Monsters Inc. од цртежите на Едгар по име Ерик, замислувајќи дека со тоа што би го вметнал во шоуто би го убедил да се врати дома. И тоа не е сè. Во меѓувреме ја следиме патеката на мајката и нејзините обиди да си го најде синот. И кампањата на градоначалникот на Њујорк за реизбор, која вклучува чистење на улиците од бездомници.
Ако ова ви изгледа премногу, во право сте. Сепак, глумата на сите вклучени, a oсобено на Камбербач, спасува дури и режисерски недоволно промислени потези и прави од ова многу гледлива серија. Со претходна историја на ментални растројства, отуѓен од студените родители и постојано во конфликт со своите надредени, телевизиските продуценти, тој во чудовиштето што го опседнува и буквално го следи зборувајќи му, го наоѓа својот единствен сојузник. Иако страшен, Ерик е всушност бенигнен во однос на другите видови чудовишта олицетворени во корумпирани политичари, педофили, „валкани“ полицајци. Како една чиста детска душа да преживее среде сиот тој хаос? Со тоа што, како впрочем и возрасните, ќе си создаде свој внатрешен свет, во кој ќе се чувствува безбеден, држејќи го за рака синовлакнестиот огромен Ерик.
