Американскиот народ не сака да биде вовлечен во уште една вечна војна под лажни изговори. Затоа ќе инсистирам сите сенатори да гласаат за мојата резолуција, поддржана од сенатори од двете партии, за што поскоро запирање на непријателствата на САД против Иран, пишува демократскиот сенатор од Вирџинија во колумна во Волстрит журнал.
Тој не негира дека Иран е лош актер, дека ги угнетува сопствените граѓани и поттикнува насилство надвор од своите граници, вклучително и напади врз американските трупи во регионот. Но, забележува дека зад овие дејствија има моќна историја, пред која многумина замижуваат.
Кејн потсетува дека Америка и Иран беа пријатели и сојузници сè додека САД не организираа државен удар за соборување на демократски избраната влада на Иран во 1953 година. Тоа доведе до седум децении непријателство - САД финансираа брутална диктатура што беше соборена од иранскиот народ во 1979 година: ирански демонстранти ја зазедоа амбасадата на САД и 444 дена држеа 66 американски заложници; САД обезбедуваа оружје за Ирак во војната против Иран во 1980-тите; милитантите на Хезболах, финансирани од Иран, ја бомбардираа касарната на американската морнарица во Бејрут во 1983 година, при што загинаа 307 луѓе, вклучувајќи 241 американски војник; истите милитанти ја нападнаа амбасадата на САД во Бејрут во 1983 година и повторно во 1984 година, при што загинаа стотици други; американската морнарица собори ирански комерцијален авион во 1988 година, при што загинаа 288 цивили...
САД и Иран имаат изградено наративи каде другиот е агресор во овој долготраен конфликт. Повеќе војна не е решение. Да беше така, изминатите 70 години ќе донесоа подобар исход од она што го гледаме денес, пишува Кејн.
Тој истакнува дека за време на администрацијата на Барак Обама, САД се одлучија на дипломатски пристап, кој во 2015 година заврши со договор Техеран да го запре секој обид за стекнување нуклеарно оружје. Договорот беше ратификуван од Конгресот согласно Законот за нуклеарен надзор. Првиот став од договорот ја содржеше суштината на договорот: „Иран потврдува дека под никакви околности никогаш нема да бара, развива или стекнува нуклеарно оружје“.
Според двете страни и Меѓународната агенција за атомска енергија, договорот функционираше, но, претседателот Трамп го раскина за време на неговиот прв мандат и се откажа од дипломатијата - и покрај противењата на неговите секретари за одбрана и надворешни работи. Тоа, според сенаторот, му дозволи на Иран да го оправда сопственото напуштање на ограничувањата од договорот.
Веста дека Трамп повторно ја напуштил дипломатијата и избрал војна против Иран е длабоко збунувачка поради неговите променливи образложенија. Тој сугерира дека тоа се должи на нуклеарната програма на Иран. Ако тоа било загрижувачко, зошто тој го раскина дипломатскиот договор што ја контролираше програмата? И зошто да се изврши напад сега, откако пред само неколку месеци изврши напад за кој тврдеше дека ја „уништил“ нуклеарната програма на Иран?
Нашите војници заслужуваат подобро отколку да бидат испратени во војна од претседател кој вети дека ќе ги прекине војните, пишува Кејн.
Иранските граѓани заслужуваат подобро отколку малтретирањето од страна на сопствениот режим и смртта на цивили, вклучително и ученици, од рацете на американските и израелските воздушни бомбардирања. Светот заслужува подобро отколку јасна порака од администрацијата на Трамп дека ниту домашното ниту меѓународното право не се важни, дипломатијата треба да се остави настрана и војната треба да биде претпочитано средство за решавање на споровите меѓу народите.
Се молам за американските војници и персонал стационирани на Блискиот Исток. Се молам за иранските цивили и сите во регионот кои се казнети од војна што никогаш не ја барале и не можат да ја избегнат. И се молам моите колеги од Конгресот да најдат сила да се спротивстават на военоподбуцнувачкиот претседател кој ја искористи нашата војска за напад врз цели во Венецуела, Нигерија, Иран, Карипското Море и Тихиот Океан без одобрение од Конгресот, додека се заканува со дополнителни воени дејства во Куба, Колумбија, Мексико, Гренланд и Бог знае каде на друго место. Колку долго извршната власт на САД ќе молчи против ова целосно отфрлање на нашиот основен уставен поредок?
