Заради маките и девалвацијата на импресијата, некои од најголемите светски сајтови решија да ги напуштат прегледите како основа за продажба на реклами и да врзат со друга метрика - време поминато на сајт.
"Неделава Фајненшл тајмс обзнани дека ќе почне да продава банери ексклузивно по нова метрика: време поминато на страна. Медиумот неодамна објави дека на дел од авторите почна да им плаќа врз основа на тоа колку време читателите трошат на нивните статии. Во февруари Upworthy го разбранува еснафот откако објави дека комплетно ги откачува импресиите за да се фокусира на она што тие го нарекуваат 'минути внимание.' А во мај компанијата за аналитика на интернет сообраќајот Chartbeat ја започна 'Attention Web' кампањата, како обид за откачување на кликот," пишува Мајлс Танзер за Базфид.
Сличен проблем со импресијата имаат и Гавкер, ама за нив решението не е во времето минато на сајт, туку работат на метрика која во основа би била - задоволство на читателот. Сајтови како Five Thirty Eight на ЕСПН, СБ Нејшн и Њу Рипаблик, сите имаат проблем со импресијата, ама не се сигурни дека времето на сајт е метриката која треба да ја изберат.
Наспроти сите нив, првиот човек на Chartbeat, кој е и еден од најголемите поборници за мерење на сајтовите според времето минато на нив, објаснува дека проблемот е што луѓето сосема погрешно размислуваат за оваа работа.
"Една интересна работа што треба да се има предвид, а се губи во дебатата, е дека ја следиш целата количина на внимание во текот на месецот. Ако им дадеш 3-минутно видео и тие го гледаат целото и не се вратат назад, твоето вкупно време на ангажирање е 3 минути. Ама ако им дадеш краток текст што ќе им се допадне и тие се вратат назад и друг пат, тоа далеку, далеку подобро. Не мора се' да биде одеднаш. Го правиш ова пишувајќи една одлична статија или пишувајќи цел куп помали статии кои ги враќаат луѓето назад на сајт," изјавува ЦЕО-то на Чартбит, Тони Хејл.
Негов дополнителен аргумент е и што времето минато на сајт ќе биде многу потешко да се злоупотреби отколку што е случајот со импресијата, заради која делењето статии на повеќе страни и слајд-шоуто станаа меѓу најомразените елементи на интернетот. Хејл смета дека најголемиот страв постои кај сајтовите и новинарите, додека на публиката "воопшто не и е гајле."
