Денвер Нагетс синоќа конечно победи и ја прекина серијата од четири порази по ред. Со нова фантастична партија на српскиот репрезентативец Никола Јокиќ кој го забележа 33-от сезонски трипл-дабл, Денвер Нагетс го победи Сакраменто Кингс 124:116.
Нагетс сега се во добра позиција да го сочуваат местото кое води директно во плејофот и да избегнат плеј-ин разигрување.
На новинарско прашање Јокиќ после мечот зборувал и за отпуштениот тренер Мајкл Мелоун кого го отпушти семејството Кренке, сопственици на Денвер.
„Тоа е дел од спортот. Луѓето доаѓаат и си одат. Меѓутоа со Мелоун имав посебна врска од десет години. Поминавме се и сешто заедно. Освоивме и титула, имаме навистина неверојатни спомени. Но тоа сè е дел од спортот.
Знаев малку пред другите. Џош (Кренке) ми кажа: 'Одлучивме', така што немаше многу дискусија. Беше тоа одлука и ми кажа зошто. Слушав и го прифатив тоа“, изјавил Јокиќ и пратил порака до ривалите:
„Сите велат дека сме ранливи. Но ѕверот е најопасен кога е ранет. Можеби тој го разбуди ѕверот“.
