Во полуфинале на германскиот Куп, Арминија Билефелд го исфрли бранителот на титулата Баер Леверкузен кој лани освои двојна круна (Бундеслига и Куп).
БАЕР ПРВ ПОВЕДЕ НО ПОТОА СЕ ПОДИЗГУБИ
Поразот на Баер Леверкузен од третолигаш кој ќе игра во големото финале е уште посензанционален ако се знае дека стоперот Џонатан Та во 17' минута ги доведе гостите во водство 0-1.
Но само две минути подоцна 20-годишниот фудбалер од среден ред на Арминија Билефелд, Мариус Верл го израмни резултатот, а 23-годишниот Максимилијан Гросер даде и втор гол за домаќинот на истек на судиското продолжение од прв дел, за пресврт од 2-1.
Во цел втор дел Баер Леверкузен не смисли нешто да се врати и заслужено испадна од Купот.
Навивачите на „аспиринџиите“ очекуваа традиционален пресврт но најмногу што направија е да создадат по некоја сериозна шанса и шутеви надвор од голот.
„Уште не можам да поверувам, ова е неверојатно! Кога излегував на терен ме лазеа морници по цело тело од таквата атмосфера, навивачите многу ни помогнаа. После првиот меч во Купот како да имавме чувство дека можеме да победиме кој било и се така продолжи. Мислам дека пред берлинското финале, ќе имаме чувство дека веќе сме направиле нешто неверојатно“, рекол голманот на Арминија Јонас Керскен веднаш после мечот.
Ова беше реална шанса за Баер Леверкузен за уште еден трофеј, Баерн Минхен е испаднат во рана фаза од Купот, а имаа одлична прилика преку третолигаш да влезат во финале. Но уште еднаш по којзне кој пат во германскиот Покал се случи чудо.
Арминија Билефелд до 90-та минута направи само една измена, односно екипата со ист состав издржа голем интензитет.
Противник на Арминија Билефелд во големото финале ќе им биде победникот од второто полуфинале Штутгарт - РБ Лајпциг кое се игра вечерва.
Интересно, Арминија Билефелд во моментов е на четврто место во трета лига (Бундеслига 2) и има само бод помалку од Сарбрикен кој е на трето место, позиција која води во доигрување за пласман во втора лига и на пет бода од Енерги Котбус кој е на место кое води директно назад во втора лига.
Арминија Билефелд досега во Купот на Германија ги исфрли Унион Берлин, Фрајбург, Вердер и Баер Леверкузен. На чекор се од пласман во еврокуп.
