Дружењето со алкохолот и држењето цигара во рака не е ништо ново што сме го чуле или сме го виделе кај некои од нашите спортисти кои го носат репрезентативниот дрес. Но тие очигледно треба да поминат низ школата на Арсен Венгер за да им дојде памет.
Францускиот стратет еднаш рече: „Храната е како керозин. Ако ставите погрешен вид во својата кола, таа нема да биде брза колку што треба".
Венгер практично е најзаслужниот човек што фудбалерите во Англија ги сменија своите навики во исхраната. Откако од јапонскиот клуб Нагоја Грампус во 1996 година се пресели во Премиер лигата, во тимот на Арсенал, тој своите методи веднаш ги примени, а тие беа искористени и во многу други англиски екипи.
Варената риба, тестенините и зеленчукот станаа главните јадења на „Топџиите". Доколку еден играч не се храни здраво, нема да биде способен да тренира онака како што треба, потоа ќе има поголем проблем за да се докаже на теренот, а ќе биде и подложен на замор.
Поради тие причини ФА ја наведува следнава листа на јадења кои треба да бидат приоритет на фудбалерите.
Едноставни јаглехидрати: слатки, безалкохолни пијалаци, џем.
Сложени јаглехидрати: ориз, леб, тестенини, компири, житарици, овошје.
Заситени масти: путер, маргарин, сирење
Незаситени масти: сончогледово масло, лосос, ореви.
Протеини: млеко, пилешко, јајца, риба, јогурт.
Витамини и минерали: овошје, зеленчук, млечни производи.
Влакна: семе, грашок, грав.
Течности: вода, спортски пијалаци.
Според овие совети, на фудбалерите им треба енерија, а таа најмногу се добива преку јаглехидратите. Дури 70% од храната на секој спортист треба да содржи јаглехидрати, но многумина од нив тоа не го сфаќаат.
Оптималниот број на калории кој треба да го внесува еден спортист е од 2400 до 3000.
Тие што не успеваат да го консумираат ова количество на калории задржуваат ниско ниво на гликоген и поради тоа имаат тешкотии да го издржат второто полувреме од натпреварот.
Потребното количество на јаглехидрати покрај со трите редовни оброци, може да се надополни и со ужина, а најважно е да се зема по завршувањето на натпреварот за да се надополни загубената енергија во мускулите.
Бананите, муслите, колачите, печивата, пудинзите, јогуртот и овошјето се само дел од потребните закуски кои се богати со јагленохидрати, а сиромашни со масти. Здравата исхрана исто така е од голема важност за опоравувањето од некоја повреда.
Можеби овој текст ви личи на совет напишан од некој нутриционист кој нема појма каков е ќејфот кога ќе му ја седнете во 7-ца, но еве ние ќе им го препорачаме на нашите спортисти кои често знаат да заглават во кафеанската база во Дебар маало.
