Летниот период за трансфери 1996-та година кој Барселона го искористи да го купи Роналдо од ПСВ, на голманската позиција се засили со Виктор Баија. Легенда на Порто со преку 500 настапи и 27 трофеи кој во тој период беше дел од листата на топ 5 голмани во светот.
Две години подоцна таа осетливо и одговорно место го пополни Ивица Краљ, прв голман на Партизан и селекцијата на Југославија со 24 репрезентативни настапи од кои сите 4 ги одигра за својата земја на Мундијалот во Франција.
И само што направи трансфер, 25 годишниот Црногорец роден во Котор го освои Супер Купот на Португалија и во Порто се најде во друштво со уште двајца балканци, Златко Заховиќ и репрезентативниот колега Љубинко Друловиќ.
Но петте трофеи со Партизан каде ја почна кариерата и меѓународното искуство со Југославија на Светско не можеа да ги сокријат слабостите на Ивица кој во Португалија стана киксер број 1, демонстрирајќи низа несреќни изведби.
Порто му даде само 7 шанси во домашното првенство и следната сезона го испрати на позајмица во Раднички Крагуевац, а на голманската позиција се врати славниот Баија, кој по деветте сезони во Порто одигра уште толку.
Краљ доби втора шанса за да докаже дека може да изгради меѓународна клупска кариера, но и таа не ја искористи. Му ја даде ПСВ каде за три години одигра на само 7 првенствени мечеви.
Потоа се врати, онаку каде што му беше најубаво, во Партизан каде играше уште 4 сезони, а кариерата ја заврши во словачкиот клуб Спартак Трнава.
Компилација со најлошите голмански проценки на Ивица Краљ.
Во четвртфиналето на ЕП 2000 прими 6 комада од Холандија, а на првиот гол реагираше како Господ да не му дал раце.
Сега е претседател на српскиот прволигаш Мачва Шабац.
