18 милиони евра Барселона ја плаќа грешката што ја направи со Алеикс Видал, фудбалерот кој до 14 години беше во нивниот младински погон.
Довчерашниот фудбалер на Севиља одигра одлична сезона, како офанзивен бек постигна 4 голови на 22 натпревари, ја освои Лигата на Европа, доби повик од шпанската репрезентација и денес беше промовиран во нов играч на Камп Ноу.
Алеикс Видал (25), кој е роден во Каталонското градче Валс сезонава ѝ помогна на Севиља да стигне до Лигата на шампионите како победник на Лига Европа, иако Андалузијците завршија како петтопласирани во Ла Лига, со само два бода зад третиот Атлетико Мадрид.
„По раѓањето на ќерка ми, ова е најважниот ден во мојот живот. Се вратив таму каде што ми е домот“, изјави Видал на денешната презентација.
Видал играл во пионерите на Барселона до 14 години заедно со Жорди Алба, кој во моментов игра како лев бек во екипата. И двајцата од истурени крила, Унаи Емери ги направи офанзивни бекови кои стигнаа до шпанската репрезентација. Алба со Емери соработуваше во Валенсија, а Алеикс Видал претходно во Алмерија.
Видал ќе биде единственото засилување на Барса до крајот на претседателските избори кој ќе се одржат во вторник. Главни кандидати се актуелниот претседател Жозеф Бартомеу и некогашниот прв човек, Жоан Лапорта.
