"Убеден сум дека Шпанија нема да не изневери и дека ќе ја победи Хрватска. Но и ние треба да ја завршиме својата задача, а тоа е в понеделник да победиме. Треба да сфатиме дека судбината е во наши раце и со многу самодоверба треба да влеземе во тој меч бидејќи само така може да се исполни целта", изјави Буфон.
Еден од најдобрите голмани на планетава верува во колегите и очекува овој тим да биде најдобар токму кога е најпотребно.
"Воопшто не треба да се сомневаме во нашиот триумф, треба да излеземе на теренот со верба во победа и да уживаме во играта. Според сите параметри ние сме подобар тим и тоа треба да го докажеме", заврши Буфон.
Сомневањата околу епилогот на дуелот меѓу Хрватска и Шпанија се подгреваат од моментот кога завршија двата меча од второто коло во Ц групата.
Аѕурите имаат непријатно искуство од 2004-тата година, кога во последното коло од првата фаза Шведска и Данска играа 2:2 и се пласираа во вториот круг, а идентичен резултат им е потребен и актуелните ривали на Италија во Полска и Украина.