Важноста на Лео Меси и лудницата која што ја предизвикува околу себе каде и да оди, довела до одлука тој да најми приватно обезбедување кое ќе го штити лично него од сите натрапници на теренот кои бараат селфи или автограм од него.
Откако дојде во САД пред неколку години, негов личен телохранител му е Јасин Чеуко кој е негова верна сенка. Чеуко не се одвојува од него а кога Меси игра на теренот, Јасин од страна крај аут-линијата трча како линијски судија за да не здогледа некој натрапник што трча кон Лео. Ги лови како мачка инсекти.
Сега МЛС лигата го известила дека му забранува присуство на фудбалските терени за време на натпреварите, вклучувајќи го тука и „Чејс Стадион“ на кој игра Интер Мајами.
Јасин нормално е лут на забраната.
„Работев во Европа седум години, во Лига 1 и во Лига на шампиони и само шест лица влетаа на терен. Дојдов во САД, работам 20 месеци - 16 луѓе упаднаа на теренот. Јас не сум проблем. Оставете ме да му помагам на Меси“.
Јасин Чеуко е платен околу 60.000 долари месечно од најдобриот фудбалер на сите времиња според многумина.
Ова не е првпат Јасин Чеуко да се буни од слабото обезбедување на стадионите во САД. Тој во февруари испратил порака до сите вработени во обезбедувањето за време на натпреварите од МЛС лигата:
„Не е моја работа да ги стопирам навивачите кои влетуваат на терен. Тоа е одговорност на стадионското обезбедување. Но да бидеме искрени: многумина од нив не се ни воопшто фокусирани на своите задачи“, рекол човекот кој е задолжен за безбедноста на светскиот шампион од 2022.
