Фудбалерите на Олимпик Марсеј допатуваа во Милано со цел да ја зачуваат предноста од еден гол која ја стекнаа на првиот натпревар и тоа одлично им одеше се до 75-та минута и покрај неколкуте сериозни шанси пред голот на Манданда.
Најдобрата шанса за гол ја имаше Весли Снајдер уште во седмата минута, но неговиот удар беше изблокиран од францускиот голман, а три минути подоцна и Милито се обиде да постигне гол со гради, но Манданда одлично интервенираше.
Гостите се држеа се до средината на второто полувреме кога по еден корнер, најдобро во мешаницата пред голот се снајде Диего Милито и ја анулираше предноста на Олимпик.
И кога сите се подготвија да ги проследат продолженијата, Брандао го замолкна Џузепе Меаца, а најверојатно и му го врачи отказот на Клаудио Раниери. По едно долго исфрлување од голманот Манданда во 92-та минута, топката стигна до Брандао кој успеа да го совлада Жулио Цезар.
Интер уште во следниот напад доби пенал по кој Марсеј остана со играч помалку откако Манданда доби црвен картон. Пацини беше сигурен реализатор на најстрогата казна, но веднаш по пеналот следеше и последниот судиски свиреж.
Фудбалерите на Баерн Минхен покажаа дека се во одлична голгетерска форма и по оние 7:1 во саботата против Хофенхајм, денес со 7:0 го растурија Базел.
Баварците уште во првото полувреме со головите на Арјен Робен, Томас Милер и Марио Гомез оствари резултат кој му гарантираше четвртфинале.
Но Баерн не застанаа тука и канонадата продолжи во второто полувреме. Марио Гомез во вториот дел за 23 минути постигна уште три голови и беше блиску да го израмни рекордот на Меси кој минатата недела му даде пет гола на Баер. Масакрот на Базел на крајот го заврши Робен кој го постигна седмиот гол за Баерн Минхен во 81-та минута.
Лига на Шампиони - 1/8 финале:
вторник:
БАЕРН - Базел 7:0 (прв натпревар 0:1)
Робен 10, 81, Милер 42, Гомез 44, 50, 61, 67
Интер - ОЛИМПИК МАРСЕЈ 2:1 (0:1)
Милито 75, Пацини 95п - Брандао 92
среда:
Челси - Наполи (1:3)
Реал Мадрид - ЦСКА Москва (1:1)
минатата недела:
АПОЕЛ - Лион 1:0 (0:1) - на пенали 4:3
Мандука 9
БАРСЕЛОНА - Баер Леверкузен 7:1 (3:1)
Меси 25, 42, 47, 58, 84, Тељо 55, 62 - Белараби 90
Арсенал - МИЛАН 3:0 (0:4)
Кошчелни 7, Росицки 26, Ван Перси 44п
БЕНФИКА - Зенит 2:0 (2:3)
Макси Переира 45, Оливеира 93
