Целата фама малку потсетува на веган, вегетаријанец, вејп и хроно феноменот: прво правило околу Whole30 е да не затнеш за Whole30.
Ајде прво да видиме што е:
Триесетдневна програма која елиминира одредени прехранбени групи од исхраната, со цел да се „ресетира” целокупното здравје, навиките и односот со храната. Или како што една Бриџит Зеитлин, која е нутриционистка, објаснува: намерата е да ви помогне да направите проценка како јадете и подобро да разберете како храната прави да се чувствувате. „Но сепак е многу рестриктивна диета,” вели Бриџит, „па не може да биде долгорочен животен план.”
И значи, што не смее?
Па, многу работи. Ако се одлучите за оваа диета не може млечни производи (чао кашкавал), мешунки (грав, грашок, леќа, кикирики, па ни извиканите соја, тофу и било што поврзано со соја), житарици (жито, пченка, ориз, јачмен, рж, па ни уште поизвиканите киноа, амарант и слични), шеќери (ни јаворов сируп ни други варијанти), алкохол, брза храна и пецива. Целата листа ја има овде.
Добро, освен вода, што можеш да јадеш?
Месо, морско и јајца. Зеленчук, одредени овошја, авокадо се разбира затоа што е Инстаграм диета и билки и зачини.
Па тури му пепел ако не може да зачиниш со соја сос!
Ај пред да туриме пепел, да не е можеби сепак добра идеја да се проба диетава? Зависи кого ќе прашаш и што сакаш да постигнеш. Некои експерти ја ставаат најдоле на списокот на најдобри диети за 2018-та, нарекувајќи ја „една од најлошите меѓу најлошите идеи за здрава исхрана.” А Зејтлин кажува дека е „премногу рестриктивна и можно е однапред да влегувате во неуспех.” Или ќе се откажете на пола затоа што е тешко, или ќе успеете до крај и после ќе јадете слонови и луѓе секој ден. Но, една друга нутриционистка, Ејми Шапиро вели дека може да е добра идеја за некој што сака да стане посвесен за своите навики. „Се работи за месец на фокусирање на храна и готвење. Те тера да размислиш што внесуваш во телото.”
Значи, какви треба да бидат оброците?
За доручек на пример јајца и зеленчук – спанаќ, кромид или домати. Смуди од растенија, бадемово млеко, кокосово масло, чија и протеински прав одобрен од Whole30. Ручекот може да биде салата со протеин (и прелив од маслинки), а за грицкање - зеленчук и гвакамоле и одредени јаткасти плодови. За вечера гледаш да биде протеини здрави за срце – лосос на пример, и многу зеленчуци.
Има ли полесен начин? Наместо да се фатиш за Whole30, Зејтлин препорачува на пример да додадеш малку повеќе зеленчук, житарки и лесни протеини во секојдневната исхрана за да бидеш здрав. И да не прескокнуваш оброци и да пиеш многу вода.
Еве што има на Инстаграм. Таму делува многу погламурозно од гледање во таван во 2 сабајле и прашување себеси дали вреди уште еден ден да поминеш со марула и авокадо.