Вести › Набрзинка

Зошто претходната власт сакала да плаќа милиони за арбитражите

24 август 2025

Од наследени осум, досега се добиени три арбитражни постапки (Казандол, Саса и ГАМА), со што биле заштедени вкупно 565 милиони евра од државната каса, обелодени министерот за транспорт и вицепремиер Александар Николоски.
Казандол, на пример, бил наследен во затворена фаза и со сериозни отежнителни околности бидејќи претходната влада во 2023 година преговарала за спогодба и не доставила нови докази.
Токму поднесувањето свежи докази и одбивањето на понудата за спогодба од 38 милиони евра било клучно за Владата да го добие спорот вреден 115 милиони евра.
Николоски го повика Обвинителството да ги истражи сомнежите во однос на тоа кој и како преговарал за арбитражните постапки и да провери зошто претходната власт сакала да плаќа милиони.

23 август 2025

Новоформираната православна заедница „Света Хилда“ во Халифакс, Англија, ја прослави својата прва литургија, означувајќи ја транзицијата на конгрегацијата од евангелизам кон православие.
На службата, одржана во католичката црква „Свети Малахиј“ за време на Успението на Пресвета Богородица, присуствувале 61 учесник, дел од нив примиле света причест, објави Антиохиската православна христијанска архиепископија на Британските острови и Ирска.
Транзицијата започнала порано оваа година кога евангелистичката конгрегација колективно одлучила да се преобрати во православно христијанство а на 6 септември ќе има голема церемонија кога со крштевање или миропомазание ќе се примат 30-тина верници.

23 август 2025

Американскиот секретар за одбрана Пит Хегсет го разреши шефот на Агенцијата за воено разузнавање (ДИА) Џефри Крузе.
Хегсет не ја објасни одлуката, но смената на генералот се поврзува со извештајот на ДИА за штетата од ракетниот напад врз воените капацитети на Иран во мај.
До медиумите тогаш протече доверливиот заклучок на ДИА дека нападите ја вратиле иранската програма назад „само неколку месеци“. Белата куќа ја отфрли таа проценка како погрешна и инсистираше дека целите биле „комплетно уништени“.
На самитот на НАТО Хегсет изјави дека извештајот на ДИА за Иран бил изработен врз основа на „слаби“ разузнавачки извори и кажа дека ФБИ спроведува истрага како документот протекол до јавноста.