Вести › Набрзинка

Зошто претходната власт сакала да плаќа милиони за арбитражите

24 август 2025

Од наследени осум, досега се добиени три арбитражни постапки (Казандол, Саса и ГАМА), со што биле заштедени вкупно 565 милиони евра од државната каса, обелодени министерот за транспорт и вицепремиер Александар Николоски.
Казандол, на пример, бил наследен во затворена фаза и со сериозни отежнителни околности бидејќи претходната влада во 2023 година преговарала за спогодба и не доставила нови докази.
Токму поднесувањето свежи докази и одбивањето на понудата за спогодба од 38 милиони евра било клучно за Владата да го добие спорот вреден 115 милиони евра.
Николоски го повика Обвинителството да ги истражи сомнежите во однос на тоа кој и како преговарал за арбитражните постапки и да провери зошто претходната власт сакала да плаќа милиони.

извор

Бугарија ќе ја „администрира“ рафинеријата на Лукоил

8 ноември 2025

Бугарското Национално собрание по итна постапка усвои закон што на државата ѝ овозможува да преземе директна контрола врз рафинеријата на руската компанија Лукоил во Бургас.
Цел на Законот е да се обезбеди работење на најголемата рафинерија на Балканот откако Лукоил поради санкции од САД беше принуден да го продаде својот имот во странство.
Владата ќе назначи специјален администратор, кој ќе управува со компанијата ако се оцени дека постои ризик по националната или енергетската безбедност на земјата. Бугарската влада тврди дека ова не е национализација, туку „заштитна мерка што ќе се активира само ако работењето на рафинеријата биде загрозено“.
Администраторот ќе има право да гласа во името на акционерите, да управува со средствата и, ако е потребно, да предложи продажба или преструктурирање на делови од компанијата.
Рафинеријата во Бургас обезбедува најголем дел од горивата за бугарскиот пазар и овозможува извоз во соседните земји.

извор

Турција објави налог за апсење на Нетанјаху

8 ноември 2025

Турција објави налози за апсење на израелскиот премиер Бенјамин Нетанјаху и високи функционери во неговата влада. Ги обвинува за геноцид против Палестинците во Газа и злосторства против човештвото.
На списокот се 37 израелски функционери, вклучувајќи ги министерот за одбрана Израел Кац, министерот за национална безбедност Итамар Бен Гвир и началникот на Генералштабот на Израелските одбранбени сили Ејал Замир.
Во соопштението на Анкара се спомнува и инцидентот од март годинава, кога беше гранатирана „Болницата за пријателство“, изградена од Турција во Појасот Газа. Израелските одбранбени сили во тоа време соопштија дека објектот го користеле оперативци на Хамас и дека „не бил користен како активна болница повеќе од една година“.
Отфрлајќи ги обвиненијата, израелскиот министер за надворешни работи Гидеон Саар ги нарече „најновата пи-ар акција на тиранинот Ердоган“.
„Налозите за апсење на високи израелски функционери јасно објаснуваат зошто Турција не треба да биде присутна во Појасот Газа - директно или индиректно“, порача поранешниот министер за надворешни работи Авигдор Либерман. Турција сака да биде дел од меѓународните сили за стабилизација од планот на Доналд Трамп за повоена Газа.

извор