Оља Ристова, судијката која го судеше предметот за случајот „Двојник" за издавање на патни исправи со лажен идентитет прашува зошто сè уште нема истрага насочена кон организаторите на криминалната шемата на издавање пасоши.
Таа во случајот „Двојник" изрече 16 години затвор за вкупно седум обвинети од овој предмет но тоа беа ситните риби во криминалната шема.
Ристова вели дека таа постапка би требало да ја покрене Обвинителството за гонење организиран криминал и корупција, но таков обвинителен акт не е покренат.
Шеснаесетгодишно момче е приведено во Москва поради убиството на Алексеј Бељаев, заменик-шеф на агенцијата Роскомнадзор задолжена за цензура на интернетот во Русија.
Според неофицијални извори, момчето Артјом А. со нож го нападнало Бељаев на влезот во агенцијата на 19 јануари. Нема никакви официјални записи за инцидентот.
Агенти од Федералната служба за безбедност брзо интервенирале и наметнале најстрога информациска блокада. Две недели не била објавена вест за убиството ни по медиумите ни на социјалните мрежи.
Во објава што брзо била отстранета од платформата Телеграм, мајката на момчето напишала дека нејзиниот син е обвинет за „убиство со политички или идеолошки мотиви“. Обвинителите тврдат дека Артјом е „жесток противник на активностите на Роскомнадзор“ и дека го планирал убиството.
Одделението на Бељаев е задолжено за блокирање сајтови, пренасочување интернет сообраќај и борба против заобиколување на наметнатите ограничувања.
Француската полиција за кибернетски криминал со поддршка од Европол упадна во париските канцеларии на платформата X на Илон Маск, во врска со истрага за „политичка пристрасност на алгоритмите“.
Истрагата е отворена во јануари 2025 година, откако либералниот пратеник Ерик Боторел јавно изрази загриженост поради „мешање во управувањето“ со платформата откако беше купена од Маск.
Директорот за сајбер безбедност во државната служба поднесе посебна жалба поради „промените во алгоритмот на X што ја засилиле непријатната политичка содржина“,
„Истрагата беше проширена по други извештаи во кои се осудува работењето на Grok на платформата X, што доведе до ширење содржина за негирање на Холокаустот и сексуални дипфејкови“, соопшти Обвинителството.
Сопственикот Илон Маск и поранешната директорка Линда Јакарино се повикани на „доброволно сослушување“ на 20 април во Париз. Како потенцијални сведоци, повикани се и вработени во компанијата.
