- Голем број граѓани од Кочани денеска учествуваа во протестниот „Марш за ангелите“ организиран од семејствата на починатите во трагичниот пожар во дискотеката „Пулс“.
- Учесниците на протестот побараа правда за загинатите деца и одговорност на надлежните за трагедијата.
- „Кој ги уби нашите ангели, кој ги уби нашите херои и кој ги пеплоса тие ангелски лица“, праша една од мајките на починатите.
- Во пожарот во дискотеката „Пулс“ во Кочани на 16 март починаа 60 луѓе, а околу 200 беа повредени.
- Словенија стана првата европска земја што воведе забрана за извоз, увоз и транзит на оружје за Израел, поради уништувањето на Газа и изгладнувањето на Палестинците.
- Премиерот Роберт Голоб објави дека владата разгледува и други мерки против израелската влада поради „сериозни нарушувања на меѓународното хуманитарно право“.
- „Премиерот јасно кажа дека Словенија ќе дејствува независно ако ЕУ не може да усвои конкретни мерки. Поради неединство ЕУ не ја исполнува оваа задача. Резултатот е срамен. Луѓе во Газа умираат бидејќи систематски е блокирано доставувањето хуманитарна помош. Умираат под урнатини, без пристап до вода, храна и основна медицинска грижа. Ова е целосно запирање на хуманитарен пристап и намерно спречување на основните услови за преживување. Во таква ситуација, должност на секоја одговорна држава е да дејствува, дури и ако тоа значи еден чекор пред другите“, објави владата.
- Словенија лани во јуни ја призна Палестина и упорно повикува на прекин на огнот во Газа и на засилено доставување храна и хуманитарна помош за Палестинците.
- Пред две недели воведе санкции и им забрани пристап на двајцата најекстремни министри во владата - Безалел Смотрич и Итамар Бен-Гвир.
- Американскиот претседател Доналд Трамп наметна царина од 15% за производите што САД ги увезуваат од Македонија.
- За 92 земји што во изминатиот период немаат постигнато директни трговски договори со САД, Трамп воведува царини од 10%, па се до 41%. За повеќето земји царините се 15%. За Индија се 25%.
- Меѓу земјите со највисоки царини се Босна и Херцеговина (30%) и Србија (35%), исто колку и за Ирак. Повисоки царини има само за Швајцарија, Лаос, Мјанмар и Сирија.
- Во посебна наредба, Трамп ги зголеми царините за увоз на производи од Канада од 25% на 35%. Како објаснување наведе дека Канада „не соработува за шверцот на наркотици во САД“. Со оваа царина нема да бидат опфатени многу производи што се дефинирани во актуелниот трговски договор САД-Мексико-Канада (УСМКА).
- На Мексико му даде рок од уште 90 дена за да постигне договор и да ги намали царините од 30%.
