- Не се само Владимир Путин и Доналд Трамп, и украинските пратеници му го оспорија претседателскиот легитимитет на Володимир Зеленски.
- На гласање во Врховната Рада, само 218 пратеници, 8 помалку од потребното мнозинство, гласаа за резолуцијата со која се потврдува легитимитетот на претседателот. Гласањето го бојкотираа 54 пратеници присутни во салата, вклучувајќи и 38 од партијата Слуга на народот на Зеленски.
- „Врховната Рада уште еднаш потврдува дека претседателот на Украина, Володимир Зеленски, беше избран на слободни, транспарентни и демократски избори. Неговиот мандат не е оспорен ниту од Украинците ниту од Врховната Рада“, пишувало во отфрлената резолуција.
- Путин одбива да преговара со претседател кому мандатот му завршил лани, а Трамп дури го нарече Зеленски „диктатор“ и побара Украина да одржи нови избори.
- Русија им понуди на САД заеднички да ги експлоатираат ретките минерали на украинска територија што е под руска окупација. „Спремни сме да привлечеме странски партнери за овие таканаречени нови територии, до нашите историски територии, кои ѝ ги вратиме на Руската Федерација“, изјави претседателот Владимир Путин. Тој додаде дека американските инвестиции се добредојдени и во Русија, на пример во топилницата за алуминиум во Краснојарск.
- Путин објасни дека Русија има „многу поголеми резерви на ретки минерали“ и воопшто не ѝ пречи САД со украински руди да ги наплатат стотиците милијарди долари што му ги даваа на Киев како воена и друга помош.
- Володимир Зеленски ја одби првата понуда од САД, со која Украина требаше да им даде на САД 50% од профитот од своите руди. Втората понуда е уште посурова - Киев да се откаже од ќарот од рудите, нафтата и гасот, плус од пристаништата и инфраструктурата, сè додека фондот за компензација не достигне 500 милијарди долари.
- И Европската Унија со задоцнување му понуди на Киев „вин-вин“ зделка за украинските критични материјали. „Поволноста на понудата од Европа е тоа што ние никогаш нема да бараме договор што не е во заедничка полза“, изјави еврокомесарот за индустриска стратегија Стефан Сежурне.
- Премиерот Христијан Мицкоски потврди дека Македонија ја поддржува предлог-резолуцијата на САД за која Генералното собрание на Обединетите нации ќе гласа на третата годишнина од почетокот на руската агресија врз Украина.
- Освен нас, уште 192 членки на ОН вечерва се соочени со незгодна задача да се определат за две спротивставени резолуции за Украина - првата предложена од Киев и поддржана од сите 27 членки на Европската Унија, а другата од Америка, со невообичаена поддршка од Русија.
- Киев предложи резолуција со осуда на „општата воена инвазија од Руската Федерација врз Украина“ и потсетува на сите претходни резолуции со кои ОН побара од Русија „итно, целосно и безусловно да ги повлече сите свои воени сили од територијата на Украина во меѓународно признаените граници“.
- САД ги притискаат сојузниците да ја поддржат нивната многу покуса резолуција. Во неа се изразува „жалење поради трагичното губење животи за време на руско-украинскиот конфликт“ и се бара „итен крај на конфликтот и понатамошни напори за траен мир помеѓу Украина и Русија“. По инсистирање од Русија, во последната реченица е додадена и фразата „да се адресираат и корените“ (на конфликтот).
- За европската резолуција Македонија гласала воздржано.
- Резолуциите изгласани од Генералното собрание на ОН не се обврзувачки, но се добар инструмент за проверка на дипломатските мускули преку надгласување.
