- Искорнати кабли, оштетени кутии, извлечени кабли, уништени струјомери... Ова беше сликата на која вчера наидоа екипите на ЕВН во Арачиново.
- Претходните обиди на ЕВН да испратат екипи во Арачиново најчесто завршувале со вербални расправии и физички пресметки. Од ЕВН велат дека полицијата ретко кога доаѓала да помогне.
- Полицијата своевремено објаснуваше дека во Арачиново не казнуваат затоа што немаат казни.
- Според пресметките на ЕВН, во Општина Арачиново годишно се краде струја вредна шест милиони евра.
- Оваа цифра Бектеши ја гледа како „само 10%“ од украдената струја на ниво на државата и тврди дека Арачиново е дискриминирано со години.
- Во 2020-та година Владата на Заев на Арачиново му даде 500.000 евра помош во услови на ковид, при што Арачиново немаше никакви посебни ковид потешкотии различни од другите општини (Види: Битка за Арачиново)
- Пред една недела Артан Груби соопшти дека на Арачиново владата му дава 1,1 милион евра за санација на канализацијата.
- Лани дознавме дека Арачиново не платило ни денар данок а годинава дознавме дека така е цели 20 години зашто немале софтвер: Шест градоначалници ја водеа оваа општина од 1996 година и никој од нив не успеал да воведе систем, односно компјутерски софтвер за наплата на овој данок.
- Најјака иронија е што името Арачиново доаѓа од зборот арач, односно данок.
- Претседателот Трамп нареди пред Националниот музеј на американската историја на Смитсонијан во Вашингтон да се постават табли со предупредувања дека дел од музејските изложби „не се точни“. Таблите ќе ги упатуваат посетителите кон алтернативни извори за историјата на САД. Трамп повика на создавање алтернативна „независна“ привремена изложба, во која би биле поправени историските податоци кои администрацијата ги смета за неточни.
- Смитсонијан 180 години функционира како независно тело и не е под директна власт на федералната администрација. Затоа, Службата за национални паркови ќе постави предупредувачки знаци на пешачките патеки околу музејот.
- На 250-годишнината од формирањето на САД, Белата куќа објави извештај во кој го обвини историскиот музеј на Смитсонијан за „идеолошко заробување“ и за „промовирање социјален активизам наместо патриотизам“. Наведува дека музејот не им оддава соодветна чест на 56-те потписници на Декларацијата за независност, туку се фокусира на ропството, угнетувањето и нееднаквоста.
- Директорката Антеа Хартиг, на сослушување пред Конгресот ја бранеше автономноста на музејот и истакна дека „прикажувањето на историјата во целата нејзина комплексност е чин на длабока почит кон националната приказна“.
- Хартиг беше особено критикувана за две неодамнешни изложби: за „Entertainment Nation“, која содржеше експлицитни сексуални прикази, и за „Girlhood (It’s complicated)“ за предизвиците поврзани со родовиот идентитет кај младите жени.
- Трамп најави дека САД ќе отворат истрага против ЕУ и ќе ѝ воведат нови царини поради „ограбување на американските даночни обврзници“, преку казни од милијарди долари за големите технолошки компании.
- ЕУ завчера му изрече казна од 890 милиони долари на Гугл поради истиснување на конкуренцијата. Трамп додаде дека ЕУ „без никаква причина“ ги казнил Епл со 15 милијарди долари, Мета со 3 милијарди долари и Амазон со 2,5 милијарди долари, а сите досегашни казни за Гугл надминуваат 18 милијарди.
- „САД не се банкомат за Европа ниту ќе дозволиме да бидат тоа... ЕУ ќе плати многу висока цена за ова незаконско и крајно неетичко однесување, за кое постојано ги предупредував. Очекуваме дека казните целосно ќе бидат поништени и може да им наметнеме значителни царини“, предупреди Трамп.
- Тој претходно се закани со царина од 100 % за секоја европска земја која ќе воведе данок на дигитални услуги за американските технолошки гиганти.
- За време на вториот мандат на Трамп беа покренати неколку истраги согласно Членот 301 од Законот за трговија од 1974 година, кој ја овластува Канцеларијата на американскиот трговски претставник да истражува трговски практики за кои постои сомневање дека не се фер.
