На Доналд Трамп му беа малку сто минути за да ги каже пред новинарите сите свои успеси од првата година на вториот мандат. Претстави и дебел топ листови. „Еве ја книгата. Секоја реченица е нешто што сме направиле. Никој претходно не направил ништо слично. Ние сме најмоќната држава на планетата“, им објасни Трамп на новинарите, а потоа ја фрли „книгата“ на подот.
На прашањето колку далеку е спремен да оди за присвојувањето на Гренланд, одговори: „Ќе видите“, и додаде: „Ќе сработиме нешто со кое и НАТО ќе биде среќен и ние ќе бидеме среќни..., но ни треба заради национална безбедност, па и за светска безбедност“.
За „трговската базука“ со која ЕУ му се закани дека ќе ја употреби како оружје против царините, одговори дека „ќе се одбие и ќе ѝ се врати на Европа“.
За акциите против имигрантите во САД тој оцени дека „моторџиите од Hell’s Angels изгледаат како најслатките луѓе на светот“ во споредба со имигрантите што неговата администрација ги отстранила од земјата.
За своите мировни напори, потсети дека смирил осум војни „затоа што му било лесно“, а не за да ја добие Нобеловата награда. „Сакам да ја решам и последната, помеѓу Русија и Украина. И кога Русија е спремна, Украина не е. Кога Украина е спремна, Русија не е“.
По прес-конференцијата, Трамп замина на Светскиот економски форум во Давос, но авионот „Ер форс 1“ по половина час лет морал да се врати поради „електричен дефект“. Делегацијата и опремата била претоварена во резервен воен авион и продолжил кон Швајцарија.
Британскиот премиер Кир Стармер се реши на битка за политички опстанок, откако неколкумина министри во неговата влада и 80 лабуристички пратеници го повикаа да поднесе оставка поради одговорност за рекордно нискиот рејтинг на партијата и еден од најкатастрофалните порази на локалните избори пред неколку дена.
Шест клучни министри од кабинетот на Стармер потврдиле за Телеграф дека на денешниот состанок на владиниот кабинет ќе побараат оставка од премиерот. Тој, сепак, не им дал збор и ги кажал сопствените аргументи зошто треба да остане на функцијата.
„Изминатите 48 часа беа дестабилизирачки за владата и тоа има реална економска цена за нашата земја и за семејствата. Земјата очекува од нас да продолжиме со управувањето. Тоа е она што го правам и она што мора да го направиме како кабинет“, им изјавил Стармер на министрите.
Стармер истакнал и дека во партијата се уште не е покренат официјален потег за избор на нов лидер, што во британскиот систем значи и нов премиер.
Премиерската позиција на Стармер е безбедна сè додека 81 пратеник од Лабуристичката партија официјално не предложат нов лидер на партијата. Министерот за здравство Вес Стритинг наводно веќе има таква поддршка, но се воздржува да ја предизвика лидерската позиција на Стармер.
На крајот на јуни во Грција на сила ќе стапи нов пакет мерки поврзани со туризмот и градењето кои надлежната министертка за туризам ги претстави како историски.
Правилата за градење ќе бидат далеку построги од сега, особено за масовно посетуваните острови како Родос, Миконос, Санторини... Новите хотели таму не ќе можат да имаат повеќе од 100 кревети.
Нови хотели надвор од официјалните градежни области ќе бидат дозволени само на големи имоти. Во зависност од регионот, ќе мора да се има површина од најмалку осум до 16 хектари.
Се забранува градба поблиску од 25 метри до морето.
