- Деца од битолското детско ликовно студио „Свети Кирил и Методиј“ деновиве без дозвола од родителите биле однесени во посета кај бугарски политичари, вклучително и претседателот Радев.
- Освен кај Радев и компанија, децата биле однесени и на грбот на цар Борис Трети, бугарскиот цар кој владее во време на бугарската окупација на Македонија и депортацијата на Евреите во Треблинка.
- Организаторите на посетата на Софија не ги известиле родителите на децата што ќе посетат и со кого ќе одат на средба, иако се должни да го направат тоа.
- Од Меѓаши ова го квалификуваат како „злоупотреба на деца за политички цели“, a МВР поднесе пријава за целиот настан.
- Претседател на Управниот одбор на Детското ликовно студио „Свети Кирил и Методиј“, е Славчо Неделковски, кој за време на посетата на „Мал Монмартр во Софија“ на почетокот на јули му врачи награда на Милен Врабевски, бугарскиот бизнисмен и филантроп кој ги финансираше бугарските клубови „Ванчо Михајлов“ во Битола и „Цар Борис Трети“ во Охрид, а кои беа избришани од Централен регистар. Врабевски доби награда за донацијата од 18.000 евра за „Битолски монмартр“ наречена „Мецена на годината за 2023“.
- По реакција на Германија и други членки, ЕУ се откажа од планот Канада да добие статус на „придружна членка“ на Европската Унија.
- Во нацрт-текстот на изјавата што ќе биде објавена на крајот од самитот Канада-ЕУ во Монтреал, изразот „придружно членство“ е заменет со „сè поблиска асоцијација“.
- Германија реагирала дека претседателката на Европската комисија, Урсула фон дер Лајен, не се консултирала со членките пред да ја претстави идејата во своето годишно обраќање во септември. Резервираност изразиле и Франција, Италија и Грција.
- „Се чини дека никој не бил консултиран за придружно членство освен нејзиниот најблизок персонал. Многу земји-членки, вклучително и Германија, не беа задоволни“, изјави дипломат од Брисел.
- Исто како и лани (видете: „Куба, извини за нашите вазали“), Македонија повторно гласаше во Обединетите нации ПРОТИВ укинување на економското ембарго од САД за Куба.
- За укинување на ембаргото гласаа 130 земји, 25 беа воздржани, а против беа 17. Резолуцијата нема обврзувачки карактер, но го покажува политичкото подредување на членките на ОН.
- Овој пат САД успеаја да убедат повеќе земји да апстинираат или да гласаат против. Меѓу земјите што гласаа против укинувањето на ембаргото беа и Словенија и Босна и Херцеговина. Германија и Италија првпат се воздржаа од гласање по повеќегодишна поддршка за укинување на ембаргото.
- САД уште во 1962 година воведоа трговско ембарго за Куба како „неопходна казна“ за комунистичката влада, која ја сметаат за „корумпирана и диктаторска“. Трамп воведе и општа блокада на гориво и се закани дека „ќе се справи со Куба кога ќе ја заврши војната во Иран“.
- Кубанците денес се соочуваат со секојдневни рестрикции на струја, немаат доволно гориво и храна, но не потклекнуваат.
- „Ова гласање ја подига свеста кај многу луѓе кои едноставно не разбираат како ембаргото влијае врз кубанскиот народ и нашиот секојдневен живот, низ што поминуваме, како страдаме... Тоа е најважно - далеку над политичките ставови или каков било вид идеологија“, изјави за Ројтерс жител на Хавана.
