- Само половина час откако на полноќ стапи на сила десетдневното примирје помеѓу Израел и Либан, израелските сили го гранатирале либанското место Бинт Џбеил, а потоа и уште неколку места во јужен Либан. Не се пријавени прекршувања од либанска страна ниту од Хезболах.
- Израелските одбранбени сили ги повикаа протераните Либанци од јужен Либан да не се враќаат во нивните места јужно од реката Литани, бидејќи овој регион ќе остане под израелска окупација додека трае прекинот на огнот.
- Војната со Израел расели повеќе од 1 милион Либанци. Илјадници излегоа на улици низ Бејрут за да го прослават примирјето. Многумина раселени семејства почнале да ги пакуваат шаторите и душеците, а некои веднаш тргнале на југ кон своите домови. Либанските власти ги повикаа да почекаат уште неколку дена, бидејќи не е безбедно поради израелските прекршувања.
- Трамп го поздрави примирјето и изрази надеж дека „Хезболах ќе се однесува убаво и добро“.
- Бенјамин Нетанјаху потврди дека израелските сили нема да се повлечат од своите позиции за време на десетдневното примирје: „Ќе останеме во безбедносна зона од 10 километри, што ќе ни овозможи да спречиме инфилтрација и лансирање ракети“. Тој додаде дека прекинот на огнот само овозможува преговори, во кои Израел од позиција на сила ќе бара разоружување на Хезболах и одржлив мировен договор“.
- Населението на ЕУ ќе се намали за 11,7%, односно за 53 милиони, до крајот на овој век, покажуваат најновите проекции на Евростат.
- На крајот на 2025 година, ЕУ имала 451,8 милиони жители, повеќе отколку во претходната година. Населението, според проекциите, ќе продолжи да се зголемува уште три години, ќе го достигне врвот од 453,3 милиони во 2029 година, а потоа ќе почне да се намалува до 398,8 милиони во 2100 година.
- Проектираната пирамида на возраста покажува дека процентот на деца и млади (до 19 години) ќе се намали од 20% на 17%, а на работоспособните возрасни лица од 58% на 50%.
- Во 2100 година 17% од жителите на ЕУ ќе бидат на возраст од 65 до 79 години, а 16 ќе бидат постари од 80 години.
- Резултатите се базираат на проценки според моделите на плодност, морталитет и миграција.
- Претседателот Володимир Зеленски потпиша нов закон со кој антисемитизмот се прогласува за кривично дело во Украина, со казни до осум години затвор.
- Во членот за „кршење на еднаквоста на граѓаните врз основа на нивната раса, националност, религиозни верувања или попреченост“, сега е додадено и „манифестации на антисемитизам“.
- „Поттикнувањето антисемитизам“ сега ќе биде казниво со 200 до 500 „минимални приходи“ (660 до 1.600 евра), со условна казна од 5 години или затвор до три години. Ако притоа се констатираат насилство, измама и закани, казната е до 5 години затвор. Ако антисемитизмот е извршен од организирана група или ако има сериозни последици, казните се од 5 до 8 години затвор.
- Во 2021 година Украина усвои и посебен Закон за спречување и борба против антисемитизмот, во кој не беа предвидени затворски казни. За форми на антисемитизам беа дефинирани негирање на правото на самоидентификација на Евреи, повици за убиство или оправдување на убиство на Евреи или предизвикување штета поради радикални идеологии или екстремистички религиозни ставови.
