- Во текст објавен на блогот Кантарот, Никола Стиков го поставува следното прашање, кое на многумина од нас ни паднало на памет: Зошто луѓе не одговараат на мејлови и пораки?
- Според него, има три претпоставки за истото: 1) Пријателите и колегите не сакаат да ни прават муабет; 2) Пријателите и колегите се преоптоварени со други работи; 3) Сите ние сме станати „топовско месо“ за алгоритмите кои ни го обликуваат светот додека сме хипнотизирани со кликање. Како да сме во видео игрица која не смееме да ја прекинеме, а која прави да се чувствуваме продуктивно тогаш кога не сме.
- „Сите револуции си ги јадат децата“, па и оваа комуникациската. Нејзините алатки ни ја намалуваат продуктивноста и нè дефокусираат - едноставно има граница колку комуникација можеме да поднесеме.
- Канадската писателка и добитничка на Нобеловата награда Алис Манро, почина на 92-годишна возраст во старечки дом во Онтарио. Таа страдаше од деменција повеќе од една деценија.
- Наречена „титан на кратката проза“ и „канадски Чехов“, Манро извршила револуција во архитектурата на кратките раскази. Објавила 14 збирки со кои во 2013 станала првиот добитник на Нобелова за книжевност од Канада.
- Последната книга, „Драг животе“, е излезена во 2012, а дел од расказите се автобиографски. Велела дека туѓите, лошо напишани книги, ја инспирирале, знаејќи дека може подобро. Покрај Нобеловата има добиено и Букер, како и канадската награда Гилер, за „Блуз од мешана крв“.
- Вчера, 12 мај, беа доделени британските телевизиски награди БАФТА. Најголемо изненадување беше признанието за Тимоти Спал за главна машка улога (за серијата „Шестата заповед“). Во својата категорија тој ги победи Брајан Кокс за „Сксешн“ и Доминик Вест за „Круната“.
- „Шестата заповед“ доби БАФТА и како мини-серија. Најдобра драмска серија е „Top Boy“ (Нетфликс), а меѓународна серија „Class Act“ (Нетфликс), во силна конкуренција на „The Bear“, "The Last of Us" и "Succession". Серијата за британското кралско семејство не доби ниту една од наградите за коишто беше номинирана - четири актерски и уште неколку во другите категории.
- БАФТА за најдобро реално шоу доби „Сквид гејм: предизвикот“, а за настан во живо минатогодишниот Евровизиски пренос од Ливерпул.