Сергеј Крикалев пролетта 1991 се подготвувал за својата мисија на вселенската станица Мир. И таа можеби би била само уште едно поглавје од неговата богата астронаутска кариера, да не се случел еден пресвртен историски настан на Земјата, кој имал неочекувано дејство и во вселената.
Токму додека орбитирал над нашата планета, веројатно често гледајќи во својата татковина СССР од далечина, таа се распаднала. Властите имале попаметна работа од тоа да се занимаваат со вселенските освојувања, а истовремено згаснале и финансиите. Плус, космодромот Бајконур, односно локацијата кадешто требало да слета Сергеј при неговото враќање, сега потпаѓале под независен Казахстан, што уште повеќе придонело за неизвесноста на неговата мисија.
Политичките прашања биле комплицирани, но исто така се комплицирало и здравјето на Сергеј. Долгото останување во бестежинска состојба влијаело врз неговата мускулна маса и коските. Иако, иронично, истата состојба предизвикала тој да биде 0.02 секунди помлад од луѓето родени истовремено со него.
Не помалку значајно било и неговото психичко здравје. Но за ова помогнала неговата редовна комуникација со различни аматерски радио оператери од светот. Особено долга врска одржал со извесна Маргарет Јакинто, Американка која подоцна се преселила во Австралија. Тие комуницирале повеќе месеци најмалку по еднаш дневно, што претставувало прво успешно поврзување на аматериско радио со вселенска станица која орбитира во вселената. Таа му пренесувала нецензурирани вести, преку кои тој можел да ја следи ситуацијата.
Крикалев се вратил на Земјата на 25.3.1992, како „последниот граѓанин на СССР“. Мисијата траела вкупно 311 денови - двојно подолго отколку што било предвидено. Заминал како граѓанин на СССР, а се вратил како државјанин на Русија. Неговото здравје било толку влошено што му била потребна помош за да излезе од шатлот. Според новинарите бил „блед како брашно и испотен како парче влажно тесто“. Во меѓувреме бил променет и називот на неговиот град, од Ленинград во Санкт Петерсбург.
Во текот на 1990-тите Сергеј имал уште мисии. Од 2009-2014 бил и раководител на тренинг центарот Јуриј Гагарин. До денес, на возраст од 66 години, тој се уште има здравствени проблеми поврзани со спомнатото заглавување во вселената. На неговата приказна се однесува кубански филм од 2017, „Серџо и Сергеј“ во кој професор и радио аматер од Хавана контактира космонаут по име Сергеј на вселенската станица МИР.
