Јермолаев го изградил своето богатство преку индустриската и комерцијална група „Алеф“, станувајќи еден од најголемите инвеститори во недвижности во Дњепар, но оттогаш отворил низа измамнички кол-центри во кои операторите се обидуваат да украдат банкарски и други критични податоци за своите жртви – претежно во ЕУ и во Русија.
Иако нема официјални податоци дека е покрената истрага против Јермолаев, неговиот бизнис цветал. Но, тој се откажа од украинско државјанство во 2019 година поради наводен судир со владини служби. Киев кон крајот на 2023 година му изрече санкции поради управување компанија за алкохолни пијалоци на Крим, анектиран од Русија.
Глобалната иницијатива против транснационалниот организиран криминал откри дека некои оператори се концентрирани на напади против Русија. На огласи за вработување кандидатите добиваат прашања дали сакаат да помогнат во поткопувањето на руската економија.
Приходите ретко влегуваат во украинската економија, туку се префрлаат на офшор сметки или криптовалути, се наведува во извештајот. Герман Граф, директорот на најголемата руска банка Сбербанк, неодамна изјави дека руски државјани биле измамени за над 2 милијарди долари преку украинските кол-центри.
Европол во извештајот за 2025 година предупреди на двојно зголемен број на измами низ Европа во споредба со претходната година. Со иста стапка се зголемува бројот на преку онлајн платформи за романтични врски. Новите модели со вештачка интелигенција помогнале да се дуплира и бројот на измами со реплицирање на глас на познаник на жртвата и со лажно претставување на полициски или банкарски службеници со цел да се украдат финансиски податоци.
Сопствениците на кол-центрите постојано развиваат нови стратегии. Стануваат сè пософистицирани, барајќи и злоупотребувајќи ранливости и кај потенцијалните жртви, објави европската полиција.
Истражување за потрошувачите проценува дека Европејците во 2025 година изгубиле 57 милијарди долари поради разни измами. Само 3% од жртвите го пријавиле кривичното дело кај властите. Загубите во банкарскиот систем се појасни: измамите при плаќање низ Европската економска зона достигнале 4,2 милијарди евра во 2024 година, во споредба со 3,5 милијарди евра во 2023 година. Измамите со кредитен трансфер изнесувале 2,2 милијарди евра, што е зголемување од 16% на годишно ниво. Корисниците сносат околу 85% од тие загуби.
Кол-центрите учествуваат само делумно во вкупниот број измами, бидејќи голем дел се префрлени на онлајн платформи. Но, Украина упорно ги користи, особено откако почна војната со Русија. Чешки детективи тврдат дека центрите се преместуваат поблизу до фронтот за да бидат подобро заштитени од евентуални рации.
Во декември 2025 година, координирана операција на службата Евроџаст разоткри мрежа што управувала со центри во Киев, Днепар и Ивано-Франкивск, со која биле измамени стотици жртви за повеќе од 11,7 милиони долари. При рацијата биле уапсени 2 лица и биле запленети фалсификувани полициски и банкарски легитимации, кеш, возила, оружје, па дури и полиграф. Во мрежата работеле стотина луѓе, регрутирани од Чешка, Летонија, Литванија и добивале провизија до 7% од она што ќе го изнудат. Највештите добивале бонуси во кеш, автомобили или стан во Киев.
Насилствата што ги генерира индустријата не се ограничени на Монако. Во февруари годинава Игор Комаров, идентификуван како оператор на кол-центар од Днепар, бил киднапиран на индонезискиот остров Бали. Неговото распарчено тело подоцна е пронајдено на плажа.
Украинските власти почнаа да ги таргетираат домашните мрежи во 2022 година, на почетокот на војната со Русија, наведува Евроџаст. Но, во земја што води војна, со ограничени ресурси за спроведување на законот, ограничен е и политичкиот апетит да се затвори индустрија што генерира милијарди.
