Декларацијата ја потпишаа шкотскиот премиер Џон Свини од Шкотската национална партија, велшкиот Рун ап Јорверт од Плаид Камри и Мери Ли Мекдоналд, лидерката на северноирската партија Шин Фејн. По победата на велшките националисти на изборите во мај, во сите три британски региони надвор од Англија првпат истовремено се на власт партии што имаат сепаратистичка агенда.
Не може да има појасен знак оти времето на Вестминстер се ближи кон крајот... Претстојат уставни промени, пишува во декларацијата.
Претставени се планови на отфрлање на економскиот модел на владата, оценет како неуспешен, и се промовира споделување идеи за економски раст и проширување на енергетските ресурси. Националистичките премиери истакнуваат дека иднината на регионите е враќање во Европската Унија – Шкотска и Велс како нови членки, а Северна Ирска како дел од обединета Ирска.
Нашите нации имаат право на самоопределување. Ниту една влада во Вестминстер нема право да ја попречува демократијата или да го поткопува принципот според кој нашиот народ одлучува за својата иднина, се истакнува во документот.
Шкотска во 2014 година одржа референдум за независност, кој доби поддршка од 45% од гласачите. Кон крајот на август годинава, шкотската влада објави нов официјален нацрт-закон за независност во кој е формулирано истото прашање како и пред 12 години: „Дали Шкотска треба да биде независна земја?“.
Според одлука на Врховниот суд на Обединетото Кралство, Шкотскиот парламент нема правна надлежност сам да распише референдум за отцепување без согласност од Владата во Лондон. Бидејќи јавното мислење во Шкотска според анкетите е сè уште речиси рамномерно поделено, Лондон го користи ова како аргумент да го блокира процесот. Премиерот Енди Барнам го известил Свини дека „прашањето е надвор од агендата, бидејќи нема јасен консензус во јавноста“.
Што се однесува до Северна Ирска, мировниот Договор од Велики петок отвора демократски пат за обединување на Ирска. Во одредбите се наведува дека треба да се распише референдум во периодот кога „ќе се чини веројатно“ дека мнозинството граѓани во Северна Ирска би гласале за напуштање на Обединетото Кралство.
Американскиот претседател Доналд Трамп пред два дена при посетата на Даблин изјави дека „би сакал да ја види Ирска обединета.
Обединувањето на Северна Ирска кон Републиката би било одлично. Како може тоа да биде лошо, изјави Трамп.
Премиерите на регионите не објавуваат прецизна временска рамка за напуштање на Обединетото Кралство. Декларацијата ја сметаат за повик до британската влада да се подготви и да овозможи уставни промени.
Свесни сме дека нашите партии имаат различни ставови во однос на уставното уредување и дека секоја нација ќе одлучува за својата иднина на сопствен начин и во сопствено време, укажуваат лидерите на Шкотска, Велс и Северна Ирска.
