Народот да помогне народот да не пуши

Филипинскиот претседател Родриго Дутерте го повика народот да му помогне да ја спроведе неговата ригорозна забрана за пушење ја јавни места. Како што тоа бидна и порано, ваквиот повик е зелено светло за секоја битанга да шета по улици и да го спроведува законот по свое видување.

Дутерте е поранешен пушач, а по искуство, тие се најлоши (заедно со онакви born again christians). Тој пред две децении ги остави цигарите и алкохолот откако лекарите му утврдија две вродени болести на кои тие навики им пречат (Баретов есофагус и Бергерова болест, ако баш).

А за да им подари здравје и на своите сограѓани тој деновиве најави стриктна забрана на пушење на јавни места (вклучително електронски цигари), дури и на тротоари.

На Филипините пуши една четвртина население кои во иднина ќе мора да пазат да не запалт цигара на 100 метри од:
- училишен двор
- игралиште
- болница и друга медицинска установа
- ескалатор
- скали
- бензински пумпи
- места каде што се подготвува храна

Забраната е проследена со повик до граѓаните да се приклучат во волонтерски единици за брза интервенција кои ќе помогнат во спроведување на законот. Истото тоа го направи и кога беше градоначалник на Давао во 80-тите што беше искористено првенствено од локалните силеџии и бараби да прават што сакаат во име на спроведување на прохибицијата.

Дутерте стана глобално познат по начинот на кој директно и брутално се справи со нарко-мафијата и уличните дилери, проект во кој изгореа илјадници луѓе (што суво, што сирово) а и самиот призна дека лично одел на улица и учествувал во егзекуција на дилерите.

*******

Види и:

Жената која живее од убивање дилери

Претседателскиот кандидат што сам себе би се помилувал

22 мај 2017 - 09:29