Преку своите профили на социјалните мрежи, луѓето од Вардар испратија отворен повик до сите компании да се вклучат во приказната и да му помогнат на клубот во најтешките времиња од неговата клупска историја.
„Во текот на вчерашниот ден испративме барање за соработка до стотици големи македонски компании, а во деновите што претстојат ќе испратиме уште илијадници понуди. Во моментите, кога клубот е во крајно незавидна финансиска ситуација, народот е единствениот негов финансиер. Па затоа, како што тропнавме на вратите на надлежните институции, така ве каниме и вас. Ви нудиме искрена и транспарентна соработка, и можност заедно со нас и народот, да бидете дел од создавањето на една голема спортска приказна. ФК Вардар е најголемиот македонски фудбалски клуб, кој со својата историја и симболика е најдобра реклама за сите нас. Се надеваме на брз позитивен повратен одговор, а ние ќе се погрижиме сите оние кои ќе застанат заедно со нас во одбраната и воздигнувањето на клубот на народот, да бидат препознаени како позитивни општествени чинители. Вашето место, како важни општествени чинители е тука - заедно со нас и народот“, стои во соопштението на Вардарци.
Луѓето од управата, навивачите на Вардар веќе иницираа кампања за собирање средства преку продажба на сезонски карти, пракса позната и во големите европски клубови.
Цената на сезонски билет е 1.000 денари и наиде на убава реакција кај јавноста, но црвено-црните сметаат дека е потребно уште многу за пристојно да се одигра новата сезона во Првата македонска фудбалска лига.
