Синот на Вучиќ е менаџер на најдобриот стрелец во Серија А?
2 декември 2021
- Душан Влаховиќ, детето на белградски Партизан, има само 21 година а сезонава на 15 меча за Фиорентина во Серија А веќе има 12 гола и е прв стрелец. Минатата сезона 2020/2021 постигна 21 гол и е прав хит во италијанскиот фудбал.
- Влаховиќ е на мета на најголемите светски клубови а неговата цена се движи околу вртоглави 80 милиони евра. Неодамна тој одби да го продолжи договорот со Фиорентина која му понудила најбогати услови во историјата на нивниот клуб. Наводно „виолетовите“ добиле негативен одговор од менаџерите на српскиот репрезентативец.
- Еден од агентите кои водат преговори во име на Влаховиќ бил и Данило Вучиќ, син на претседателот на Србија, Александар Вучиќ, објави Мрежата за истражување криминал и корупција (КРИК) од Белград.
- Италијанската La Repubblica тврди дека токму Данило Вучиќ е одговорен што фантастичниот центарфор одбил да продолжи договор со Фиорентина иако му е понудена највисока плата во историјата на клубот од Фиренца.
- Данило Вучиќ неколку пати е фотографиран во друштво со криминогени лица од српското подземје, а отворено со нив другаруваше на Светското првенство 2018 во Русија.
- Агенцијата International Sports Office од Белград која го извела трансферот на Душан Влаховиќ од Партизан во Фиорентина рекла дека не се вистинити тврдењата дека Данило е менаџер на шпицот.
