Покер во Варшава, Севиља владее со Лига Европа

Во своето четврто европско финале, Севиља стигна до четвртиот пехар. На тој начин тимот од Андалузија обезбеди и директен пласман во Лигата на шампионите од следната сезона. Во Варшава вечерва, Севиља беше подобра од Днипро 3-2 (2-2).

 

Шпанците направија пресврт во првото полувреме, Днипро израмни пред паузата на 2-2, за да во вториот дел Карлос Бака со својот втор гол им донесе голема радост на Андалузијците. Двете екипи одиграа фантастично прво и мирно второ полувреме во главниот град на Полска. Подобро почнаа Украинците, кои по акцијата на Матеус и Калиниќ стигнаа до водство во седмата минута.

Следуваше силен притисок на Севиља, која во средината на првото полувреме во рок од три минута направи пресврт со головите на Кришовијак и Карлос Бака. Пред финишот на првиот дел, Украинците израмнија по совршениот шут на Ротан од слободен удар од повеќе од 25 метри.

 

Во вториот дел двете екипи играа резервирано, со многу дуели и фаули. Се чекаше грешка на ривалот и тоа се случи во 73' минута. Одбраната на Днипро реагираше неспретно, топката стигна до Витоло кој го проигра Бака, а Колумбиецот реализираше за конечни 3-2.

 

Хајлајтс од мечот и сите голови:

Церемонијата на доделување медали и пехарот: