Незаборавниот меч го доби Ривер, и славје и тага во Буенос Аирес

Ривер Плејт и Бока Јуниорс ја потсетија Европа како се игра фудбал со страст и срце. Пред скоро полн „Сантијаго Бернабеу“ во Мадрид „милионерите“ славеа 3:1 и се радуваа на пехарот во Копа Либертадорес.

Средбата почна подобро за Бока Јуниорс на чија клупа како и повеќе пати сезонава останаа ветеранот Тевез, Мауро Зарате и стартерот од првиот меч на „Бомбонера“ Рамон Абила. 

Поддржани од најбараниот фудбалер од двете екипи во моментов, Колумбиецот Вилмар Бариос како и крилото Виља, во шпицот на нападот на Бока беа Кристијан Павон и репрезентативецот Дарио Бенедето.

Токму Бенедето по едно фантастично додавање на Нандез во 44’ минута од првиот дел го отвори резултатот со маестрален бег на одбраната на Ривер:

Ова беше петти гол на последните шест меча за Бенедето кој не баш ферски го прослави зад грбот на бекот на Ривер, Монтиело.

Еуфорија и громогласна песна за навивачите на Бока кои претходно беа надгласени од ривалите од спротивната страна (повеќето навивачи седеа зад двата гола).

Во вториот дел Ривер не падна психолошки туку излезе на терен храбро и одважно бараше гол. Заслужено го изработија израмнувањето со можеби најубавиот гол на вечерта по акцијата на Игнацио Фернандез и Енцо Перез за корпулентниот Лукас Прато да ја круниса со гол:

Од тој момент се играше повеќе на половината на Бока која имаше неколку повремени полу-контри кои брзо ги завршуваа искусните стопери на Ривер Маидана и Пинола.

До крајот од регуларните 90 минути не видовме посериозни шанси и се влезе во продолженија. А таму, само што почна првото, Бока остана без својот клучен играч Вилмар Бариос кој доби втор жолт и автоматски црвен картон поради груб старт:

Тогаш веќе беше јасно дека Ривер дополнително ќе стисне на гас за да стигне поблизу до трофејот. 

Клучен момент на средбата беше влегувањето на одличниот Колумбиец Хуан Кинтеро во 58’ минута од второто полувреме. Малиот и брз Кинтеро неверојатно ги проигруваше колегите а во 109’ минута од продолжението распали со левицата и постигна прекрасен гол за 2-1 и тотално лудило меѓу црвено-белите на „Сантијаго Бернабеу“:

При резултат 2:1 за Ривер, двајца фудбалери од одбраната на Бока беа во грчеви и едвај стоеа на нозе а нововлезениот капитен Гаго ги остави на цедило соиграчите и излезе од игра буквално среде игра без да добие знак од судијата или својот тренер:

Бока со двајца играчи помалку кои излегоа поради повреда (тренерот Скелото ги направи сите измени), имаше сериозна шанса да израмни на 2-2 по еден шут на Леонардо Хара:

 

Бока последните пет-шест минути од мечот ги одигра со голманот излезен во противничкиот шеснаесетник. Таков ризик не се исплатеше и Ривер начека една топка за брза контра која што феноменалниот Гонзало Пити Мартинез ја заврши со гол во празната мрежа за конечни 3:1 и огромно славје на трибините каде што беа нивните навивачи:

На крајот од мечот наградата за најдобар играч на финалето од Копа Либертадорес заслужено ја доби Хуан Кинтеро кој имаше асистенција и гол и кој беше клучен за пресвртот на Ривер:

И старо и младо што навива за Ривер излезгло на улица во Буенос Аирес:

Ова беше 6 финале за Ривер и вкупно 4 титула во Копа Либертадорес. Бока го одигра 11 финале, има дури 6 титули.

Ривер изгубил финале во 1966 од Пењарол и 1976 од Крузеиро а му се радувал на пехарот во 1986, 1996, 2015 и 2018.

Од друга страна Бока губела финале во 1963 од Сантос, во 1979 од Олимпија Асунсион, во 2004 од Онсе Калдас, во 2012 од Коринтијанс и сега 2018 од Ривер.

РИВЕР - 4 ТИТУЛИ ВО КОПА ЛИБЕРТАДОРЕС
БОКА - 6 ТИТУЛИ ВО КОПА ЛИБЕРТАДОРЕС

10 декември 2018 - 09:35

Штета ако сте пропуштиле

Повели Стеф

Љубов од Припор

Златни јајца

Бронзен медал за стиропорна Македонија