Елиф Елмас беше автор на најважните голови во квалификациите за пласман на Светско 2022. Прво во чудесниот триумф против Германија на гости а после два ефектни против Исланд за три бода со кои завршивме втори во група и се изборивме за бараж.
Во репортажа од УЕФА ТВ, Елмас вели:
„Секогаш кога ќе добијам повик за репрезентацијата на Македонија едвај чекам со срце да дојдам да играм. Дај Боже да се пласираме на Светско, со задоволство и без проблем ќе направам торта. Ако треба на плоштад ќе направам голема торта, само да се пласираме на Светско првенство“.
Семеен бизнис на семејството Елмас, уште одамна е познатата слаткарница Мандарина во скопската населба Автокоманда. Таму Елмас понекогаш со голема љубов помагал во изработка и служење на слатките.
„Секогаш се трудам да научам, гледам, зошто занаетот е многу важен и некогаш ќе ти притреба во животот“, додава ѕвездата на Наполи.
Елмас по заминувањето на Пандев во заслужена пензија е новиот предводник на генерацијата која направи историски успех со пласман на прво Европско првенство/
