Клубовите веќе ги потврдуваат екипите од 25 регистрирани фудбалери кои ќе можат да играат во Лига на шампиони
На конгресот во Тирана во четвртокот УЕФА донела ново правило според кое сите клубови сезонава ќе можат да направат една измена во регистрација на фудбалерите во текот на сезоната при групната фаза.
Ова значи дека ако некој фудбалер се повреди на подолго време, клубот ќе има право да го замени со друг кој не бил регистриран претходно.
„Извршниот комитет потврди амандман за прописите во машките клупски турнири во 2025/2026 кои дозволуваат привремена замена на најмногу еден играч кој би заменил веќе регистриран играч со долготрајна повреда или болест за време на лигашката фаза вклучувајќи го и 6. коло.
Причината за ова прилагодување е да се осигура дека списоците на играчи нема да бидат неправедно намалени и играчите да бидат заштитени од дополнителен притисок од работа“, стои во објавата на УЕФА.
Покрај таа одлука, УЕФА донела и промена во однос на терминот за финалето на Лига на шампиони кое веќе нема да се игра од 21 часот. Првото финале кое ќе се одигра со почеток од 18 часот ќе биде овосезонското, на стадионот „Пушкаш“ во Будимпешта, Унгарија.
