Спид важеше за стабилна личност и по завршувањето на неговата кариера како фудбалер, изгради репутација на еден од најинтелигентните млади фудбалски тренери. 42-годишниот Спид водеше живот на кој многумина може да му позавидат и беше оженет и татко на два сина.
Легендата на Премиер лигата својата слава ја доби уште во неговиот прв клуб, Лидс Јунајтед каде настапуваше осум сезони и ја освои шампионската титула во 1992-та година, а подеднакво беше почитуван и во Евертон, Њукасл и Болтон. Бранејќи ги боите на овие клубови тој стана првиот фудбалер кој стигна до 500 настапи во Премиер лигата.
Гери Спид одигра 85 натпревари за репрезентацијата на Велс, а во 2010-та година на селекторската функција го наследи Џон Тошак и требаше да го предводи националниот тим на натпреварите против Македонија во рамките на квалификациите за Светското првенство во 2014-та година.
Причините за самоубиството на Спид се сè уште мистерија. Само неколку часа пред неговото самоубиство тој во одлично расположение бил гостин на емисијата на БиБиСи и во неговиот живот не постоеја никакви знаци дека може да се случи таква трагедија.
