Робин ван Перси оваа сезона постигна 26 голови во Премиер лигата (вкупно 33 во сите натпреварувања) и не само што е најдобар стрелец во Англија, туку успешно им парира и на Кристијано Роналдо и Лионел Меси во трката за освојување на Златната копачка која му се доделува на најдобриот стрелец во Европа.
Во својата кариера Ван Перси ги има брането боите на само два клуба. Во 2004-та година Арсенал му плати околу три милиони евра на Феенорд, но на почетокот заради честите повреди тој не успеваше да да се наметне со добри игри во континуитет и се случуваше да одигра само 40 натпревари во две сезони.
Во екипата на Феенорд тој играше како крило, на почетокот на кариерата во Арсенал играше најчесто на позицијата „десетка", улога која пред него ја имаше Денис Беркамп, а потоа и како „лажна деветка" во стилот на Меси во Барселона, па се до класичен напаѓач.
Ван Перси уште од 2005-та година е значајна алка во тимот на „топџиите" но вистински експлодираше оваа сезона кога ја презеде капитенската лента од Фабрегас.
Со претрчани 11,5 километри по натпревар, тој е рекордер помеѓу напаѓачите во Европа, а со 33 постигнати голови Ван Перси го одржува Арсенал во борбата за место во Лига на шампиони.
Одличните настапи ја разгореа и битката за неговиот потпис. Манчестер Сити, Барселона, Реал Мадрид, Челси, Јувентус, Интер... долг е списокот на екипи кои пројавиле интерес за него, а сите беа дополнително охрабрени кога тој одлучи да ги одложи разговорите околу продолжувањето на неговиот договор со Арсенал.
Неговиот сегашен договор со топџиите истекува во јуни 2013-та година. За осум години колку што тој помина во Арсенал, Ван Перси доби милион пофалби, но само еден трофеј од ФА купот.
Робин ван Перси има 28 години и очајна потреба да освојува трофеи и да се докажува на повисоко ниво. Доколку Арсенал не успее да се квалификува за Лигата на шампиони следната година, ниту сите пари во северен Лондон нема да бидат доволни да го задржат во тимот.
