Пред некое време пишувавме дека Хелен Мирен ќе ја глуми Голда Меир, израелската „челична дама“, и уште од тогаш се радувавме на изведбата. Во меѓувреме, Хелен Мирен се соочи со проблеми и осуда, затоа што веќе се научивме дека во денешно време е проблем да играш лик со потекло што не е твоето. Тогаш, британската актерка Морин Липман го нарече кастингот „Jewface“, затоа што според нејзе „еврејството на Голда Меир е интегрален дел од нејзе“.
„Хелен ќе биде супер. Добра актерка, секси и интелигентна. Сè е на место. Моето мислење, и само тоа е, едно мислење, е дека ако расата на ликот, или полот, го води или го дефинира портретирањето тогаш точниот - со еден општ термин - етникум треба да биде приоритет.“
Режисерот на филмот е Евреин од Израел, Гај Натив, а Хелен Мирен има руско и англиско потекло, но не и еврејско.
Во меѓувреме, внукот на Голда, Шаул Рахаби го одбрани кастингот и рече „дали е Еврејка или не нема врска“ и дека е сигурен дека Хелен ќе биде одлична.
Сега Хелен Мирен одговара на контроверзите - и самата имала сомнежи за прифаќање на улогата.
„Секако дека се наметна и тоа прашање пред да прифатам. Реков, види, Гај, не сум Еврејка и ако сакаш да размислиш за тоа и ако одлучиш да одиш во поинаков правец, не се лутам. Апсолутно ќе разберам. Но тој навистина сакаше јас да ја играм улогата и тргнавме.“
Додава и дека мора да се води и тој разговор и апсолутно е легитимен, но и дека тоа наметнува други тешки прашања за тоа кои улоги еден актер смее да ги прифати.
„Знаете, ако некој што не е Евреин не смее да игра Евреи, дали некој што е Евреин ќе игра некој што не е Евреин? Ако има актер со инвалидитет, кој е брилијантен, но имал многу малку шанси, а сега доаѓа прекрасна улога за актер со инвалидитет, ако сè е праведно, тој или таа треба да ја добие улогата.“
Единствениот страв ѝ е дали воопшто ќе ја бива за Голда.
Еве, видете само од фотографија:
„Се плашам само да не сум ужасна како Голда. Ако биде така, завршено е со мене.“
