Откако им дојде Алесандро Микеле, на Гучи не им е само до облека - се мешаат во што стигнат. Микеле пушта пипци насекаде - од Вес Андерсон бои до секакви други закачки со поп-културата. Во неговиот свет, машките носат сукњи, светкавите комбинезони се носат за дневно кафе, а кофи за мраз чинат скоро 1000 долари. Новата пастелно-розева, гумена кофа за мраз на Гучи на Farfetch чини 950 долари и плус, можете да си докупите Гучи шолја за кафе од 290 долари, за, како што коментираат од i-D.vice, да си ги чувате најлуксузните коцки мраз.
Гучи си направи концепт од мешање во секојдневни предмети. Има цела една понуда за „гучизирање” на целото ваше секојдневие - на пример, можете да почнете со плишан параван од 32.000 долари. За да додадете на атмосфера, имате миризливи стапчиња од 70 долари, а за до супермаркет имате безбол капче за 300 долари.
Микеле веројатно не е ни единствениот дизајнер што шета низ некое Хубо за инспирација - лани Раф Симонс пушти самолеплива трака за 302 долари и се разбира, да не заборавиме на циглите на Supreme што беа 30 долари парче.
И нели, спајалицата.
Следно - кеси за ѓубре, можеби?
Ќе видиме. Ама ич нема да се изненадиме.