- Синиша Каран победи на вонредните претседателски избори во Република Српска. Кандидатот поддржан од досегашниот претседател Милорад Додик освоил близу 51% од гласовите, околи 12.000 гласа повеќе од противкандидатот Бранко Блануша од опозициската СДС.
- Опозицијата не го призна поразот и побара повторување на гласањето во Зворник, Добој и Лакташи поради неправилности во гласањето.
- Каран важи за близок сојузник на Додик, кој беше разрешен со судска пресуда поради сепаратистички активности. Му беше забрането повторно да се кандидира.
- Новиот претседател на РС ќе има мандат од само една година. Редовните претседателски избори ќе се одржат при крајот на 2026 година, заедно со парламентарните.
- Американски авиони и хеликоптери вчера извршиле воздушни напади врз 70 цели на групата ИСИС во Сирија како одмазда за убиството на двајца американски војници и нивниот преведувач пред една недела близу Палмира.
- „Ова не е почеток на војна, туку одмазда. Под водство на претседателот Трамп, САД никогаш нема да се колебаат за одбрана на нашиот народ“, порача шефот на Пентагон, Пит Хегсет.
- Ова е прва голема интервенција на САД по затоплувањето на односите со привремениот сириски претседател Ахмад ал Шара, поранешен лидер на терористичка група по кого беше распишана американска потерница со награда од 10 милиони долари.
- Трамп синоќа ја повтори поддршката за Ал Шара и за сириските владини трупи, за кои оцени дека се „на страната на САД“ во борбата против тероризмот.
- Украинското раководство има тесен простор за дипломатско маневрирање и тешко може да ги заштити своите „црвени линии“ во мировниот договор со Русија, вели Давид Арахамија, парламентарниот лидер на владејачката партија Слуга на народот. Тој вели дека сегашниот притисок од САД е шанса за мир. Без американско учество, на Украина ѝ преостанува да го реши проблемот по воен пат.
- „Многумина сè уште веруваат дека треба да инсистираме на фантастични услови. Договорот ќе биде лош или многу лош, или воопшто нема да има договор“, вели Арахамија, претставник на прагматичното крило на партијата на претседателот Зеленски.
- Тој ги смета за „слаби“ безбедносните гаранции што западните земји ѝ ги понудија на Украина, и кои опфаќаат колективна реакција од НАТО ако Русија го прекрши мировниот договор. „Во случај на напад, членките на НАТО ќе мора да се состанат на консултации во рок од 72 часа. Извинете, ама тоа не е доволно. На 24 февруари речиси ја изгубивме земјата за 72 часа“, изјави Арахамија.
- Тој бара дефинирање конкретни обврски за одвраќање, во врска со тоа кое оружје, какви ракети и во кои количини ќе бидат достапни и како ќе се финансира војската.
- Американските преговарачи Стив Виткоф и Џаред Кушнер и рускиот Кирил Дмитриев денеска во Мајами ќе одржат нова рунда разговори за крај на војната. За да прифати мир, рускиот претседател Владимир Путин бара целосно повлекување на украинските сили од Донбас и цврсти гаранции дека НАТО повеќе нема да биде закана за Русија.
