Државниот секретар Марко Рубио предупреди дека ако за неколку дена не биде постигнат напредок со Киев и Москва, САД ќе ги прекинат напорите за крај на војната во Украина.
„Стигнавме до точка во која мораме да решиме и да утврдиме дали воопшто е можно да ставиме крај на војната или не“, изјави Рубио, кој синоќа во Париз се сретна со претставници од Европа и од Украина.
„Ова не е наша војна. Ние не ја почнавме. САД ѝ помагаа на Украина три години и сакаме да заврши, но тоа не е наша војна“, додаде Рубио.
САД и Украина вчера потпишаа меморандум за соработка со природните богатства, како завршен чекор кон договорот за експлоатација на украинските ретки минерали. Претседателот Трамп изјави дека договорот е речиси готов и ќе биде потпишан до четврток.
Унгарската влада нема да го поддржи седумгодишниот буџет на ЕУ сè додека Брисел не ги деблокира сите суспендирани европски средства, порача премиерот Виктор Орбан.
Европската комисија неодамна поднесе предлог на буџетот од 2028 до 2034, тежок две милијарди долари за кој се вели дека ги приоретизира одбраната и конкурентноста на европската економија.
Последниве 15-тина години Орбан редовно се судира со Брисел околу миграциската политика и ограничувањата на правата на ЛГБТ+ заедницата. ЕУ суспендираше милијарди евра помош за Унгарија, бидејќи се одолговлекуваат недоразбирањата околу владеењето на правото.
„Ваков буџет ќе ја уништи Европската унија,“ гласеше првата проценка на Орбан на предлогот на Урсула фон дер Лајен.
Кинескиот премиер Ли Чијан предлага создавање глобална организација за соработка, координација и безбедност на развојот на вештачката интелигенција. На отворањето на Светската конференција за ВИ во Шангај, Ли ја опиша вештачката интелигенција како „нов мотор за развој“, но забележа дека секоја земја има сопствени регулативи.
„Глобалното управување со ВИ е фрагментирано. Има големи разлики во концептите за регулација и правилата. Мора да ја засилиме координацијата и да формираме глобална рамка за управување со ВИ“, изјави Ли.
Без да ги спомне САД и нивната забрана за извоз на најсовремени чипови во Кина, Ли предупреди дека ВИ може да биде „ексклузивна игра“ за неколку големи земји и компании.
На годишната конференција во Шангај, спонзорирана од кинеските власти, учествуваат истакнати експерти и лидери од светот. Меѓу говорниците се Џефри Хинтон, познат како „Кумот на ВИ“ и поранешниот директор на Гугл, Ерик Шмит. Досега редовно учествуваше и Илон Маск, но годинава нема да се обрати.
Повеќе од 800 светски компании ќе претстават 3.000 хај-тек производи, 40 големи јазични модели, 50 уреди со ВИ и 60 роботи.
