- Гледањето и слушањето птици го подобрува менталното здравје кај 91% од луѓето.
- Заклучокот е изведен од 700 илјади луѓе, од кои било побарано еден час да бројат птици во локалниот парк и после да кажат виделе ли фајде.
- На девет од десет им било подобро.
- Тој еден што е намќор, живо нè занима.
- Сè повеќе француски градови воведуваат полициски час за движење на деца по низата насилни пресметки поврзани со трговија со дрога. Според Министерството за внатрешни работи, повеќе од 110 луѓе биле убиени и 300 биле ранети во 2024 година во пресметка меѓу нарко-банди низ Франција.
- Ним вчера воведе забрана за движење од 21 до 6 часот на лица помлади од 16 години „за да не бидат изложени на насилство“ и ги зајакна полициските патроли. Во неколку улични престрелки во овој град во изминатиот месец беше убиено едно лице, а неколкумина беа ранети. Градоначалникот Жан-Пол Фурние изјави дека ситуацијата е „неодржлива“ и дека наркобандите создале „клима на страв и терор“.
- Безие, кој лани воведе полициски час од 23 до 6 часот за деца под 13 години сега ја прошири забраната до возраст од 15 години. „Десетгодишник што се шета по улици во 2 часот не е ништо друго туку пакосник“, изјави градоначалникот Робер Менар.
- Лимож воведе забрана за ноќно движење на деца помлади од 13 години за време на летниот распуст.
- Франција неодамна усвои закон за зголемување на затворските казни за наркобароните, формирање ново одделение на обвинителството и доделување специјален заштитен статус за информатори.
- Доналд Трамп објави трговски договор со Токио, кој вклучува намалување на американските царини и зголемување на јапонските инвестиции и кредити во САД.
- Царините од 25% што требаше да стапат на сила од 1 август се намалени на 15%. Тоа е особено големо олеснување на јапонската автомобилска индустрија, која една четвртина од своето производство го пласира на пазарот во САД.
- Јапонскиот премиер Шигеру Ишиба забележа дека договорот содржи најниска царинска стапка за која било од земјите што имаат трговски суфицит со САД.
- Договорот го обврзува Токио да инвестира до 550 милијарди долари во клучните американски извозни сектори, како фармацијата и полупроводниците. Јапонија ќе увезува и ориз од САД.
- Негодуваат американските производители на автомобили, кои забележуваат дека царината за јапонски возила, без американски делови, е 15%, а за оние што се склопуваат во Канада и во Мексико, со американски делови, е 25%.
