Не можеше да посака поубав гол Елиф Елмас како прв за оваа сезона. Тргна сам со топка од средина на теренот, си поигра со својот чувар и лесно во свој стил го реши и него и голманот за конечни 0:2 за Наполи против Салернитана. Македонскиот репрезентативец влезе во 67-ма минута, а убавиот погодок го постигна во 82-ра минута.

По препораката на француските власти и еколошки друштва, фудбалските клубови од Лига 1 на своите гостувања ќе патуваат и со воз, наместо со авиони, со цел заштита на животната средина. Монпеље на гости кај ПСЖ стигнал со воз. Патувањето траело околу три ипол часа, а растојанието меѓу двата града е 750 км.

Кошаркарите на Црвена звезда после серија од порази конечно победија во Евролига. Во белградска Арена беа подобри од Баерн Минхен 74:68, а потегот на вечерта беше додавањето на Милош Теодосиќ до центарот Боломбој.

Ваква фудбалска грозница одамна немало во Јужна Америка. На нозе е цел Рио де Жанеиро, а властите на улица ја извадиле и војската. Причина: утре од 21:00 се игра големото финале на Копа Либертадорес меѓу Флуминенсе и Бока Хуниорс на култната „Маракана“ во Рио де Жанеиро.

Во само два дена, Сан Антонио Спарс по втор пат му го зема скалпот на големиот фаворит за завршницата во НБА лигата, Феникс Санс. Во средата Спарс славеа 115-114, а синоќа убедливо победија 132-121.

Најдобриот светски тенисер синоќа многу потешко од очекувањата го победи анонимниот Холанѓанецо Талон Грикспор со 4-6, 7-6, 6-4. Во текот на мечот париската публика постојано го провоцираше и исвиркуваше Новак кој им одговори со пцовки.

Француски АСВЕЛ конечно ја забележа првата победа во Евролига после серија од 18 порази по ред во овој турнир што е негативен рекорд. Џанмарко Поцеко е нов тренер на екипата, а Италијанецот синоќа после триумфот 88-91 на тешкото гостување кај Жалгирис направи шоу.

Великанот од Амстердам веќе подолго време минува низ најголемата криза во долгата клупска историја. Како резултатски така и управувачки, Ајакс е на самото дно. И прашање е како ќе се крене од таму.

Иако до стартот до Европското има уште два месеци и кусур, ЕХФ почна да ја загрева атмосферата, а од македонскиот национален тим објави феноменална одбрана на Митревски против Португалија, која инаку се претвори во асистенција.

Реал Сосиедад победи во раната фаза од шпанскиот Кралски Куп со 0-1 кај нисколигашот Буњол. На клупа кај гостите очекувано останаа најдобрите играчи кои одмараа, па таа прилика ја искористи едно дете да му пријде на Јапонецот Такефуса Кубо и да си добие дрес. За возврат имаше и детето нешто до Кубо.

ЛА Лејкерс конечно после 11 порази по ред, го победија градскиот ривал ЛА Клиперс со 130-125. Јунак на триумфот беше Леброн Џејмс со лудачка партија: 35 поени, 12 скока и 7 асистенции. Ентони Дејвис додаде 27 поени со 10 скока и 3 асистенции а Д’Анџело Расел имаше исто 27 поени со 6 асистенции. Леброн Џејмс направи и еден многу интересен трик.

По триумф над чешката тенисерка Маркета Вондрушова 6:4, 6:4, туниската тенисерка Онс Жабур имаше емотивно интервју на самиот терен. Зборуваше за невино настраданите во војната меѓу Израел и Палестина и се расплака.

Во навивачкиот свет има два стари стила на бодрење, еден е британскиот строго со песна, дланки, грла и без знамиња, балони, пароли и тракатанци, а вториот е италијански со многу пиротехника, огномети, бакљи, петарди и кореографии. Ама вчера вечер имало исклучок. Во Шкотска на меч од тамошната Премиер лига меѓу Данди и Ренџерс, гостите од Глазгов запалиле стотици бакљи за призор каков што не е виден досега на фудбал во Велика Британија.

Во мега дербито на бразилскиот фудбал, лидерот на тамошната Серија А Ботафого и второпласираниот Палмеираш одигаа луд натпревар со дури седум гола. Домаќините водеа 3-0 во 36’ минута а Палмеираш славел на крај 3:4 со комплетен пресврт во 90+9’ минута. Ендрик, 17-годишниот фудбалер кој од следната година оди во Реал Мадрид, постигна два прекрасни гола.

Лео во една прилика раскажа дека најубаво му е кога ќе се сети на голот со глава во финале на Лига на шампиони во Рим против Манчестер Јунајтед кога Барселона го освои пехарот. Овојпат откри дека сепак најдраг му е оној против Реал во полуфинале на Лига на шампиони на „Сантијаго Бернабеу“ во 2011-та година.

Симоне Инѕаги е можеби еден од најпотценетите тренери, кој да не заборавиме успеа да го однесе Интер во финале во ЛШ. Погледнете ја оваа шема со многу итриштина. Го враќа Барела како стопер, а важна улога во акцијата изненадно му дава на Ачерби, инаку задолжен за одбрана.

Нова сензација во Купот на Германија. Баерн Минхен изгуби од третолигашот Сарбрикен 2-1 со примен гол во 90+6’ минута! Уште еднаш во својата богата клупска историја Баварците потклекнаа пред третолигаш кој е на 15-то место во трета лига.

По големо невреме и силен дожд Ливерпул успеа да го преброди тешкото гостување кај Борнмут на гости во Лига Купот и со победа 1-2 се пласираше во следната фаза. На прес-конференција после мечот Клоп забележал на еден телевизор дека крајниот резултат на мечот Ман. Јунајтед - Њукасл е 0:3 па имаше интересна реакција.

Се работи за сезоната 2003/2004 во Анкона, кога Горан имал 20 години и имал слаба минутажа, па кај тренерот ургирал 10 години постариот од него Милан Рапаиќ кој му бил цимер и кој го отрул со цигари во соба.

Наџ Рази има 17 години. По потекло е Алжирец. Игра за ирскиот клуб Шамрок Роверс во тамошната лига. Носи број 10, веќе е првотимец, а има настапи и за младинските селекции на Ирска У17 и У16. Веќе го следат бројни ловци на таленти од европските гиганти, а наводно Реал Мадрид го пикирал. „Кралскиот клуб“ летово го купи најголемиот турски талент Арда Ѓулер, а со 20-годишниот Џуд Белингем покажа во која насока оди.

Навивачите на Олимпик Марсеј му приредија викендов дивјачки пречек на Лион, а работата до толку излезе од контрола, што мечот не се ни одигра. Најдебелиот крај го изеде стратегот на гостите Фабио Гросо, кој завршил со 13 конци.

На меч против Гранада, ако ти се падне да го бркаш или да се бориш за топка со Брајан Сарагоса, треба да си Болт. Висок е 164см или 6см понизок од Меси и едноставно нема стигање. Не потсети на Бејл со оној славен трк кога излезе од терен и успеа да се врати, нешто што на 22 годишното крило му успеа на другата линија покрај гол.

На мечот меѓу Депортиво Гарсиласо и Алијанза Лима, гостинските навивачи го внесоа најголемиот тапан на тамошниот континент. На крај нивниот тим славеше 0-1 со гол на ветеранот Ернан Баркос (едно време играше во Црвена звезда). Алијанза има 37 бода и е трета на табела со два бода зад Универзитарио кој има 39.

Третиот тенисер на АТП ранг листата, Русинот Данил Медведев изгуби во 2. коло од Бугаринот Григор Димитров со 2-1 по сетови 6-3, 6-7, 7-6. Медведев одново влезе во конфликт со трибините и никако да сфати дека што повеќе се буни, повеќе го исвиркуваат.