Васко може да ви остави впечаток на човек кој бааги зборува. Ама па, кога ќе видиш колку е вреден и тоа вреден без државни субвенции и лигавења, и кога ќе видиш колку музика прави и тоа колку добра музика прави, ти иде да го најдеш и да му кажеш: Збори ми Васе колку сакаш!

Еден многу непријатен календар што годините на животот ти ги цепка на недели, па прави да излгеда многу поинаку кога ќе видиш дека на 40 години (во твојата 2030-та недела од животот) си безмалку на половина својот работен век и повеќе од половина од животниот век.

Знаете кој е цар на проточната фристајл рап мисла, така? Е па, Маршал Поуп од Алабама е на другиот крај на таа скала. Ако на царот стиховитe и римите му доааѓат преку оптика, Маршал е на дајал-ап. 

Трите девојки/другарки им се позади, а тие тројца одат напред, крчат пат, го освојуваат градот, јаки се, им се може. И почекајте, не е само првиот глуп.

Дечково така умешно ги користи рацете што треба да е среќен што не е Капетан Кука. Па едно сабајле во веце по грешка да се избрише со погрешната рака.

Пред години (иха, седум минале) објавивме за идејата на Тим Кук секој корисник на Ајтјунс да добие бесплатен примерок од албум на U2. Дечково, со Лед Цепелин маица, е толку напнат на таа тема што ќе ги задоволи вкусовите и на најпребирливите хејтери на Боно и екипата. 

Веројатно самото тоа што кога си излегол од дома заедно со клучевите и новчаникот си ставил и кашикара во џеб, навестува дека си спремен истата да ја употребиш во „ферка“ дури и ако наоколу има 9-годишни деца.

Тинејџерки се зезаат па со заврзани очи пробуваат во себе да го разбудат третото око и да осетат кога и на каде да го избегнат шишето кока кола кое се клати напред-назаад, врзано за коноп. Нивното џедајско сетило понекогаш прави бравурозни утки.

Аријана Гранде и Џејмс Корден, песната се вика „Нема веќе локдаун“. Бљуц.

Ако имате пари, на синот можете да му купите вистинско Ламборгини Сиан Родстер. Ако немате пари, а ве бива за дрво, можете како на видеото. А можете и како нас, да му купите Киндер јајце, па, ако му се падне, падне.

Настрана нашето вечно неразбирање на идејата да дадеш пари за да дигаш нешто тешко (оди растоварај камион, ебате, ем на отворено, ем некоја парица ќе падне), видеово ни е смех заради универзалното алиби за смех: затоа што му се случува на некој друг.

Со задоволство ќе ве запознаеме со овој дражесен бенд, формиран во ерата на карантинот. Колт (таткото, на гитара) и Обри (мајката, снима) имаат три деца и вишокот пандемиско време го користат на најубав можен начин - вежбајќи песни. Убедливо најголема ѕвезда е малата. Чист дестилат од ведрини и радости.

„Како би било кога светот би ги гледал САД како држава која се меша во изборите на други земји и сите знаат за тоа?“
Џо Бајден, 78 години, шегаџија.

Дечкото признава дека е можно дека за ова размислува премногу. Ама е можно и дека не размислува доволно. Секој да си размисли (за себе, немојте на меил за тоа).

Ситуацијата е вонредно комплицирана, бидејќи пластичните кеси остануваат штетни, ама не толку штетни на пример како памучните торби или торбите за повеќе користења. Ама за ова да држи треба да се земе предвид која кеса / торба колку пати ќе биде искористена, и на крај што ќе се направи со неа, а и тогаш ќе треба малку штимање на равенката за да добиеш некој резултат.

Конзервативниот кандидат за претседател на Иран, Мохсен Резаеаи, има „веќе виден“ ама набилдан план за решавање на иранските економски проблеми. Со активно учество на Американците. Да киднапираат едно илјада комада и после да бараат пари. Јане Сандански би рекол, брат, многу малтретирање ти е тоа.

Задачата е да се процени интелигенцијата на другите во групата. Eдна од нив, Марија, вербално многу вешто, рационално и убедливо образложи зошто го смета Тајлер за најглуп. А потоа доаѓа вистинското рангирање.

Погледнете колку и кринџ и монтипајтоновски изгледа ова Г7 видео. Како да не помислите дека некои од оние стварно моќните, уствари се имаат кладено (за симболична цена од еден долар) дека ќе ги натераат сите јавно познати големи фаци еден ден да се поздравуваат со лакти, како некои глупи?

Ќе се појават ли кај нас полицајци кои ќе се занимаваат со вакви ситуации, или сите ќе продолжат да кмишат со радари по сите можни патишта и автопатишта во земјава? Ние би станале полицајци само за да можеме по цели денови да ги пеналиме баш ваквите, најпаметните. Погледнете само какво убаво чувство за правда раѓа оваа полициска интервенција.

На македонски натпревар за таленти, некој би свирел на шуплива тиква, некој би правел трикови со карти и сè ок. На јапонски, ти излегува нешто вакво и не знаеш дали да догледаш за да ја сфатиш финтата или да фаќаш магла дур е време.

На неброени метри квадратни, на неброени возила, на неборени милиони народ треба да си уникатен тип на баксуз ова на тебе да ти се случи. Снимката е од Мумбаи по неодамнешните обемни врнежи на дожд.

Запа раскажува како му е дрпната песната Кинг- Конг откако ја отсвириле на негов концерт ( а и пуста Јоко се качила на сцена, оти без неа свирка не бидува), но е мастрален со каква луцидност го затепа корпоративниот менталитет на МТВ. Дражесен момент и е самото запознавање на Запа и Ленон, кога Ленон му рекол дека не е грд како што мислел, по што Запа се посомневал во диоптерот на Ленон, пошто вика дека тој секогаш бил грд колку што може да се биде грд.  

Тежината што Гаокао испитот (кинескиот приемен за на факултет) го има во одредување на животот на Кинезите до сега е опишана на долго и на широко, меѓутоа речиси и да не постои текст кој може така успешно да го долови пеколот на овие три дена полагање како татко на средношколец што полага кој со сатар ги брка колите што свират на улица пред училиштето.

Јапонски производител на сладолед на видео ги вади целиот свој менаџмент и вработени во знак на официјално извинување до сите свои муштерии за гревот што после 25 години морале да го поскапат сладоледот од 60 јени на 70 јени (од 28 на 32 денари).