Вести › Набрзинка

Црногорските граѓани не можат да влезат во Србија?

4 June 2026

Српската полиција од синоќа не ги пропушта граѓаните на Црна Гора да ја преминат границата со Србија, што се смета за одговор на протерувањето на 87 српски државјани од аеродромот Тиват поради „загрозување на националната безбедност“.
Од средата во 19.30 часот ниту еден црногорски државјанин не преминал во Србија преку граничните премини Гостун, Јабука и Драченовац. „Тие спроведуваат засилени мерки исклучиво против црногорските граѓани“, изјавил за „Вијести“ извор од службите за безбедност.
Н1 јавува дека на преминот Гостун се врши детална безбедносна контрола на сите полнолетни мажи од Црна Гора.
Претходно во средата, црногорската полиција поради „безбедносни причини“ не им дозволила влез во Црна Гора на група од 87 српски државјани што пристигнале со чартер лет во Тиват и по неколку часа ги вратила со лет до Белград. Некои од нив имале криминално досие. Српски опозициски медиуми ги опишуваат како лица „блиски до владејачката СНС“, кои биле ангажирани за обезбедување на партиски простории, спортски натпревари и протести.
Српската безбедносно-разузнавачка агенција (БИА) објави дека го советувала претседателот Александар Вучиќ да не патува на самитот ЕУ-Западен Балкан во Тиват поради висок безбедносен ризик. Ова се базира на оперативните сознанија на БИА дека во Црна Гора е присутен лидерот на Кавачкиот клан, Радоје Звицер.

извор

Претставничкиот дом на САД изгласа мерка за запирање на војната со Иран

4 June 2026

Претставничкиот дом на САД вчера првпат успеа да изгласа резолуција што го блокира претседателот Трамп да ја продолжи војната против Иран без одобрување од Конгресот.
Резолуцијата беше усвоена со 215-208 гласа, откако на демократите им се придружија четворица републикански конгресмени.

За да стане обврзувачка, резолуцијата мора да биде одобрена и од Сенатот.
Резолуцијата за воени овластувања од 1973 година наведува дека претседателот мора во рок од 60 дена да ги отстрани американските сили од какви било војни без овластување од Конгресот. Претседателот може да го продолжи тој рок за уште 30 дена за да овозможи безбедно повлекување на трупите.
Војната против Иран почна на 28 февруари, пред 96 дена, но Белата куќа тврди дека на сила е примирје од 8 април.

извор

ИЈЗ: Десетици не доаѓале на работа, им плаќале на колеги да им ги отчукуваат картичките

3 June 2026

Околу 20-30 луѓе во период од 6-7 години не се имаат појавено на работа во Институтот за јавно здравје а редовно земале плата. Сите биле уредно регистрирани во системот за евиденција на работа, за што им плаќале на одредени колеги по 200 евра.
Освен редовната плата, вработени во Институтот земале и пари преку договор за дело, на пример за полевање на двор.
Ревизија не е направена од 2017 а деновиве Државниот завод за ревизија изрази негативно мислење за работата, во периодот кога директор бил д-р Шабан Мемети.
Директорката на Институтот, д-р Марија Андоновска, одела по канцеларии и ги прашувала луѓето што им е работа, некои признавале дека не знаат бидејќи и онака не доаѓаат баш често.
Се случувало архивар да зема основна плата од 98.000 денари, но да добива и други надоместоци.
„Дел од работите веќе се јавно изнесени, очекував дека до сега нешто ќе се случи, декаЈавното обвинителство ќе ги слушне овие работи, ќе почне некаква постапка, но да се надеваме дека кога го имаме и формално-правно извештајот од Државен завод за ревизија, можеби сега ќе реагира Јавното обвинителство“, вели Андоновска.

извор